Republika e Kenias i ka njohur pasaportat e Kosovës, përcjell InLajmi.
Lajmin e bëri të ditur kreu i Aleancës Kosova e Re, Behgjet Pacolli, i cili ka realizuar një vizitë me presidentin e Kenias William Ruto në Nairobi.
Pacolli e ka quajtur “historik” vendimin e Kenias për të njohur pasaportat e Kosovës.
Gjatë këtij takimi presidenti Ruto e ka njoftuar Pacollin se Republika e Kenias ka zyrtarizuar fillimin e bashkëpunimit me Republikën e Kosovës në të gjitha fushat e interesit të përbashkët.
Postimi i plotë i tij:
Sot, vizitova në Nairobi Presidentin e Republikës së Kenias, mikun tim, William Ruto, për ta falënderuar për miqësinë e tij ndër vite. Gjatë takimit ai më njoftoi se ka marre vendim me të cilin Republika e Kenias ka zyrtarizuar fillimin e bashkëpunimit me Republikën e Kosovës në të gjitha fushat e interesit të përbashkët. Njohja e pasaportes së Republikës së Kosovës është hapi i parë i konkretizimit. Ky është një moment historik për raportet diplomatike të Kosovës me Kenian. /InLajmi/
