Është kjo ekspozita e 4 personale e piktorit prizrenas Arbnor Morina, i cili në këtë cikël të prezantimit para adhuruesve të shumtë të artit, gjeti si frymëzim lirinë në kaos , shkruan InLajmi
Qytetarët prizrenas dhe mysafirët e tjerë të rastit apo qëllimor, këto ditë në Qendrën për Art dhe Kulturë në Prizren, patën rastin që ta vizitojnë ekspozitën personale të piktorit Arbnor Morina, ku janë ekspozuar afro 70 punime artistike që shfaqin një larmi të stileve, përjetimeve dhe të koncepteve, në teknikën vaj, thëngjill, laps. etj, të punuara gjatë viteve, por edhe muajve të fundit, e ku më së shumti dominojnë ngjrat: e kuqja, e verdhja, e kaltëra dhe ngjyra e zezë.
E veçanta e kësaj ekspozite, që dallon nga shumë ekspozita të tjera klasike, që mund t’i hasim në galeritë e ndryshme, apo në mediat elektronike, nuk ishte vetëm titulli, “Hallakamë pa rregulla…”, por edhe vetë ambienti ekspozues, ku krahas veprave të përfunduara, janë edhe punimet ende të papërfunduara, si dhe mjetet e tjera të punës, sikur që janë brushat, pëlhurat, ngjyrat, librat dhe gjëra të tjera, që edhe e shoqërojnë artistin gjatë punës së tij shumë vjeçare në art dhe pikturë.
Sipas kuratorit të ekspozitës Valon Bllaca, bashkë me idenë për këtë ekspozitë, pos punimeve ka ardhur edhe koncepti për ta prezantuar edhe atelienë e piktorit, ku vizitori ose adhuruesi i artit pamor, mund të perceptoj se si vjen procesi deri tek realizimi i një pikture. Sipas tij aty në atelie ekziston një rrëmujë apo “hallakamë”, që megjithatë ofron një ambient frymëzues.
“Ishte sa interesante aq edhe joshëse për mua si artist të paraqitem në këtë formë”, – tha në fillim të bisedës sonë Arbnor Morina. – “Në këtë ekspozitë vizitorët mund të njihen më për së afërmi me artin dhe kompleksitetin e krijimtarisë sime, ngase jo çdo njëri ka mundësi që ta vizitojë një artist në studion e tij. Procesi i krijimit të një pikture, bëhet me javë, me emocione, me vizatime, me skica, dhe nëse nuk me pëlqen e mbuloj, dhe krejt këtë proces që mund të shihet këtu në këtë ‘hallakamë’, qytetarët mund ta kuptojnë më për së afërmi dhe më mirë se sa i ndërlikuar është krijimi i pikturës”, ka tha në fund të bisedës për InLajmin, piktori Arbnor Morina.
Të shtojmë se pos katër ekspozitave personale që I kishte në vendin tone, piktori Morina, ka marrë pjesë edhe në dhjetra ekspozita të tjera kolektive, sin ë Tetov, Shkodër, Tiranë, Gostivar, Prishtinl, etj. Ndërkaq këtë ekspozitë të fundit e kambështetur Drejtoria për Kulturë, Rini dhe Sport e Komunës së Prizrenit. Osman Goranci/Inlajmi/
