Të paktën 13 persona kanë vdekur si pasojë e një tërmeti me magnitudë 6.5 që goditi Afganistanin verilindor dhe disa qytete të mëdha pakistaneze, transmeton InLajmi.
Tërmeti me magnitudë 6.5 dëmtoi ndërtesat dhe shkaktoi rrëshqitje dheu në Afganistan dhe Pakistan.
Epiqendra e tërmetit u regjistrua 40 kilometra në juglindje të qytetit afgan Jurm në vargun malor Hindu në 187.6 kilometra thellësi, njoftoi Shërbimi Gjeologjik i Shteteve të Bashkuara.
“Në Afganistan, të paktën 4 persona kanë vdekur dhe 70 të tjerë u lënduan”, sipas Sharafat Zaman Amar, zëdhënës i Ministrisë së Shëndetit Publik.
Por numri i viktimave mund të rritet pasi ekipet e kërkim-shpëtimit arrijnë në më shumë fshatra të prekura, tha Shafiullah Rahimi, një zëdhënës i Ministrisë së Menaxhimit të Fatkeqësive. Disa nga rrethet e goditura nga tërmeti janë jashtëzakonisht të largëta dhe nuk kanë shërbim celular, shtoi Rahimi, shkruan CNN.
Në Pakistan, të paktën 9 njerëz vdiqën, duke përfshirë 2 fëmijë, pasi shtëpitë dhe ndërtesat e tjera u shembën në provincën Khyber Pakhtunkhwa. /InLajmi/
