Kombëtarja e Kosovës në karate nuk është lejuar që të garojë me simbole shtetërore në Kampionatin Evropian në Gualdalajara të Spanjës, kjo për shkak se kjo e fundit nuk e ka njohur Kosovën, përcjell InLajmi.
Komiteti Olimpik i Kosovës është shprehur i shqetësuar për diskriminimet që po u bëhen sportistëve tanë nga shtetet, të cilat ende e përziejnë sportin me politikën.
KOK e ka informuar menjëherë Komitetin Olimpik Ndërkombëtar, nga të cilët pret reagim të shpejtë, në mënyrë që karateistët tanë të mos e humbin edhe një garë të rëndësishme, siç ndodhi javë më parë me Evropianin e të rinjve në Qipro.
Postimi i plotë nga KOK:
Komiteti Olimpik i Kosovës me shqetësim të madh është duke përjetuar diskriminimet e sportistëve tanë nga shtetet, të cilat ende e përziejnë sportin me politikën.
Së fundi, dhe jo për herë të parë, Spanja sërish bëhet faktor, duke rikthyer “regjimin” e vjetër për sportistët tanë, pavarësisht se disa vjet më parë ishte treguar korrekte në këtë drejtim dhe pikërisht me sportistët e njëjtë.
Për shkak të mosnjohjes së shtetit tonë, kombëtarja jonë e karatesë nuk është duke u lejuar të garojë e barabartë me garuesit tjerë në Kampionatin Evropian, që sot pritet të nis në Guadalajara të Spanjës. Atyre iu është kumtuar lajmi nga organizatori se institucionet vendase nuk e kanë lejuar organizatorin që të shfaq simbolet tona shtetërore.
KOK, që është në kontakt me FKK-në, ka informuar menjëherë Komitetin Olimpik Ndërkombëtar (IOC), nga të cilët pret reagim të shpejtë, në mënyrë që karateistët tanë të mos e humbin edhe një garë të rëndësishme, siç ndodhi javë më parë me Evropianin e të rinjve në Qipro.
Evropiani është garë kualifikuese edhe për Lojërat Evropiane Krakovia 2023
