Gjermania e ka bërë të qartë se pa pjesëmarrjen e serbëve të Kosovës në zgjedhjet lokale të parakohshme që do të mbahen në 4 komunat në veri të vendit, nuk do të ketë krijim të Asociacionit.
Një deklarim të tillë e ka bërë në Beograd, Carsten Meyer-Wiefhausen, Zëvendës shefi i misionit të ambasadës gjermane në shtetin fqinj.
Siç raportojnë mediat në Serbi, Meyer-Wiefhausen e ka sqaruar se formimi i Asociacionit të Komunave me Shumicë Serbe, nuk është i mundur, nëse listat e kandidatëve për zgjedhjet lokale që Kosova planifikon t’i mbajë në 4 komuna në veri të Kosovës, nuk janë dorëzuar.
Siç raporton agjencia e lajmeve “Beta”, Carsten Meyer-Wiefhausen citohet të ketë deklaruar se; “kjo është një çështje krejtësisht praktike”.
I pyetur për pasojat e mundshme nëse listat e kandidatëve nuk dorëzohen brenda afatit, në panelin e diskutimit , ai ka thënë se -“nëse nuk keni zyrtarë, kryetarë komunash, nuk mund të krijoni një komunitet komunash”.
“Pa njerëz në to, nuk keni institucione”, ka thënë ai.
“Ju duhen ato institucione. Kaq e thjeshtë është”, është shprehur diplomati gjerman.
Ndërkohë, afati i caktuar nga Komisioni Qendror i Zgjedhjeve i Kosovës për aplikimin e kandidatëve për zgjedhjet që planifikohen të mbahen në katër komuna në veri të Kosovës në fund të muajit prill, ka skaduar, transmeton RTK.
Lista Serbe nuk ka paraqitur listën e kandidatëve dhe për rrjedhojë ajo nuk do të marrë pjesë në zgjedhje.
