Partia Demokratike e Kosovës , po e sheh si të mangët marrëveshjen apo dakordimin mes Kosovës dhe Serbisë në takimet që zhvilluan palët në Bruksel dhe Ohër.
Nënkryetarja e PDK-së, Vlora Çitaku ka treguar arsyet pse partia që ajo i takon po e kundërshton një marrëveshje të tillë.
“Dialogu i tillë çfarë është sot me ndërmjetësimin e BE-së ka filluar në kohën kur PDK ka udhëhequr Qeverinë e Kosovës. Kundërshtimi ynë me marrëveshjen nuk ndërlidhet me zbatimin e marrëveshjeve të nënshkruara më herët, ne jemi të shqetësuar me atë se çfarë i mungon kësaj marrëveshje. Ne nuk mund të sillemi në vitin 2023 dhe të llogaritemi të përmbushur në këtë vit duke ricikluar dhe duke rinoterizuar marrëveshjet e bëra një dekadë më herët”, u shpreh Çitaku.
“Fillimisht s’mund ta quajmë as marrëveshje sepse nuk ka nënshkrim, ka një dakordim. Pikë së pari nuk është finale as gjithëpërfshirëse dhe i mungon njohja reciproke në qendër. Kjo marrëveshje ky tekst karakterizohet nga ajo që në diplomaci quhet dykuptimësi konstruktive, e cila është e dobishme për të ndalë luftërat, por për të ndërtuar paqe të qëndrueshme marrëveshja duhet të ketë qartësi”, u shpreh nënkryetarja e PDK-së.
Çitaku kritikoi kryeministrin Albin Kurti për qasjen e tij në procesin e dialogut, duke thënë se kjo marrëveshje apo dakordim është rezultat i qasjes së tij arrogante.
“Kjo marrëveshje e tillë çfarë është nuk ka pikur nga qielli, është produkt i negocimit dhe qasjes së kryeministrit Kurti në dialog tash e 2 vite. Ju kujtoj këtu kohën kur kryeministri thoshte se dialogu nuk është prioritet fare, ose prioriteti i 7 apo 12. Në vend që dialogu të trajtohej seriozisht dhe kryeministri të shkoj me ofertën e vetë tek aleatët tanë, kryeministri zgjodhi që të hap “front” për targat. Unë kam qenë në SHBA në nëntor të vitit të kaluar na ka marrë shumë energji për me sqaruar pozicionin e Kosovës për targat, sepse është e pakuptimtë për dikë që të bëhen thirrje për luftë për një gjë të tillë, në ndërkohë që ajo çfarë do të duhej të bënte kryeministri ishte të trokas në Washington, Paris, Berlin, Bruksel, Romë e Londër dhe me aleatët të dakordojë një marrëveshje më të mirë…”, tha Çitaku për Telegrafin
Ajo theksoi se fatkeqësia është që ne do të shpenzojmë dekada e vite në një proces dialogu, në ndërkohë që kemi pasur një kontekst të favorshëm për ta përmbyllur njëherë e përgjithmonë.