Liridon Salihu nga Grupi për Studime Politike dhe Juridike, vlerëson të gjeturat e raportit të Departamentit Amerikan të Shtetit për liritë e të drejtat e njeriut për shtetin e Kosovës, e paraqesin gjendjen reale në Republikën e Kosovës dhe se tregojnë që ende kemi prezencë të korrupsionit në institucione dhe mostrajtimin adekuat të këtyre rasteve nga ana e gjyqësorit.
“Pavarësisht veprimeve e punës që është bërë në luftën kundër korrupsionit, shihet që korrupsioni ende e mban primatin në institucione dhe ende i kemi institucionet brenda të cilëve punojnë zyrtarë që janë të prekur nga kjo dukuri negative”, deklaroi Salihu.
Sipas tij, ky raport është kredibil që e paraqet gjendjen reale në shtetin e Kosovës, dhe se të gjeturat sa janë të mira, në anën tjetër të gjitha këto duhet t’i shërbejnë qeverisë të krijojë mekanizma, të aplikohen ligjet për secilin dhe persona të cilët kanë një figurë të tillë që mund të jetë edhe figurë korruptive ose ka dyshime ndaj asaj figure, e njëjta të mos shërbejë në kuadër të institucionit.
Në këtë raport për vitin e kaluar, për Kosovën thuhet që të ketë probleme serioze në lidhje me çështjen e korrupsionit qeveritar, mungesën e hetimeve dhe përgjegjësive për dhunën në baza gjinore. Aty përmenden edhe probleme tjera që përfshijnë format tjera të dhunës dhe të krimeve apo kërcënimeve ndaj minoriteteve etnike e të grupeve tjera të margjinalizuara. Është potencuar edhe hetimi për vdekjen e aktivistit të Vetëvendosjes, Astrit Deharit.
