Kryeministri i vendit Albin Kurti, ka folur për gjetjet e Departamentit Amerikan të Shtetit për Kosovën, raporton InLajmi.
Kurti premtoi se vërejtjet dhe kritikat nga Departamenti Amerikan i Shtetit do t’i trajtojë me shumë seriozitet dhe përpikëri.
“Ne bëjmë maksimumin e mundshëm, nuk e kursejmë as vullnetin, as përpjekjen e as dijen që e kemi. Gjatë këtyre 2 viteve Kosova ka shënuar përparime të mëdha, a jemi aty ku duam, ende jo. Mirëpo të gjitha ministritë, teksa shënojmë këtë javë 2-vjetorin në qeverisje, e bëjnë më të mirën e mundshme. Edhe vërejtjet, kritikat të cilat na jepen do t’i marrim me shumë seriozitet e do t’i trajtojmë me përpikëri”, tha ai.
Gjithashtu Kurti komentoi edhe marrëveshjen e Brukselit, për të cilën tha se Serbia përsëri refuzoi të nënshkruajë ani pse për të janë dakorduar.
“Me datën 18 gusht të vitit të kaluar e kemi pasur marrëveshjen, por ka refuzuar ta nënshkruajë presidenti i Serbisë, siç refuzoi edhe më 27 shkurt në Bruksel, siç refuzoi edhe më 18 mars në Ohër. Teksti është i dakorduar qysh me 18 gusht të vitit të kaluar dhe unë besoj që ai dakordim porsa të behët marrëveshje ndihmon shumë në zbardhjen e fatit të të pagjeturve, e sigurisht që është i nevojshëm edhe drejtësia për viktimat. Në këtë rast viktimat nuk janë vetëm të zhdukurit me dhunë por viktima janë edhe familjet e tyre dhe shoqëria në përgjithësi”, ka thënë ai. /InLajmi/
