Deputeti i Lidhjes Demokratike të Kosovës Avdullah Hoti, ka adresuar sërish kritika në adresë të Qeverisë së Kosovës për çështjen e Trustit Pensional, përcjell InLajmi.
Sipas tij, kursimet që nuk iu dhanë qytetarëve të Kosovës po avullohen në tregje financiare, pasi nuk ka kush t’i kthejë në Kosovë për t’i mbajtur si para të gatshme.
Hoti thotë se Kosova nuk ka qeveri funksionale. Për më tepër, ai thekson se Kosova nuk ka as president që kujdeset për institucionet kushtetuese.
Postimi i plotë i tij:
Disa banka në SHBA kanë falimentuar. Një bankë në Zvicër është në vështirësi.
Ndërkaq, mjetet e investuara të Trustit Pensional janë pa zot. Trusti nuk ka Bord për t’i tërhequr mjetet nga tregjet dhe fondet që janë në rënie. Humbjet janë me miliona.
Nuk ua dhanë një pjesë të kursimeve qytetarëve, siç u kërkua me projekligjin e inicuar me peticion nga qytetarët. Tani ato kursime po avullohen në tregje financiare pasi nuk ka kush t’i kthejë në Kosovë për t’i mbajtur si para të gatshme.
Qeveri funksionale Kosova nuk ka. Por nuk ka as President për tu kujdesur që institucionet kushtetuese janë funksionale. /InLajmi/
