Presidenti i Malit të Zi, Milo Gjukanoviq, politikani veteran që ka shërbyer në postet më të larta shtetërore për 33 vjet, do të përballet në raundin e 2-të të zgjedhjeve presidenciale me ish ministrin properëndimor të ekonomisë Jakov Milatoviq, meqë asnjëri prej tyre nuk siguroi shumicën e mjaftueshme për një fitore në zgjedhjet e së dielës.
Qendra për Monitorim dhe Hulumtim në Podgoricë, tha se sipas rezultateve paraprake presidenti aktual dhe kandidati i Partisë Demokratike të Socialistëve, Milo Gjukanoviq, ka fituar numrin më të madh të votave, përkatësisht, 35.4%.
Kandidati i Lëvizjes Qytetare “Evropa Tani”, Jakov Milatoviq, fitoi 29.3%.
Kandidati i Frontit Demokratik pro-serb dhe pro-rus, Andrija Mandiq siguroi 19.1% të votave
4 kandidatët tjerë morën prej 10.9 deri 0.8% të votave.
Qendra për Tranzicionin Demokratik njoftoi se në zgjedhjet presidenciale morën pjesë 344.700 votues, që i bie 63.6% të 542.154 qytetarëve me të drejtë vote.
Sipas raporteve të vëzhguesve dhe Komisionit Shtetëror të Zgjedhjeve, dita e zgjedhjeve kaloi relativisht e qetë, pa ndonjë parregullsi të theksuar që do të mund të prishte procesin zgjedhor.
Në raundin e 2-të të zgjedhjeve që do të mbahet pas 14 ditësh, me 2 prill, konkurrojnë 2 kandidatët që kanë marrë numrin më të madh të votave.
Këto janë zgjedhjet e katërta presidenciale që nga rivendosja e pavarësisë, por kësaj radhe zgjedhjet presidenciale u zhvilluan në një mjedis krize institucionale dhe politike.
Viteve të fundit, shumica e paqëndrueshme dhe heterogjene parlamentare zëvendësoi dy qeveri, të cilat e zhytën Malin e Zi në një krizë institucionale dhe thelluan më tej ndarjet në skenën politike.
Që nga viti 2020, nuk ka pasur përparim në procesin e negociatave për anëtarësim në Bashkimin Evropian për shkak të arritjeve të pamjaftueshme në procesin e reformës, shkruan VOA.
Vendi i vogël buzë Adriatikut u bë anëtar i NATO-s në vitin 2017, pas një përpjekjeje të dështuar për grusht shteti në vitin 2016 për të cilin qeveria fajësoi agjentët rusë dhe nacionalistët serbë. Moska i hodhi poshtë pretendimet e tilla.
