Deputeti i Kuvendit të Kosovës nga radhët e LDK-së, Avdullah Hoti tha se trusti pensional ka mbetur pa Bord nga data 1 mars 2023, përcjell InLajmi.
E sipas tij mungesa e këtij bordi ka shkaktuar pasoja të mëdha dhe qytetarët tani po i ndjejnë pasojat.
Tutje ka theksuar Hoti se në mungesë të Bordit, kursimet e mbledhura nga Trusti gjatë këtyre muajve nuk do të mund të investohen në tregje financiare.
Postimi i plotë i tij:
TANI PO I NDJEJMË PASOJAT E MUNGESËS SË BORDIT TË TRUSTIT
Trusti Pensional ka mbetur pa Bord nga data 1 mars 2023. Rreth 2.5 miliardë të kursimeve pensionale të investuara në tregje financiare janë në mëshirë të fatit.
Pasojat tanimë po i bartim.
Çmimi i njësisë së FKPK-së është në rënie nga 3 mars 2023 e këndej. Kjo po ndodh për shkak të disa sinjaleve për krizë të mundshme në tregjet financiare nga falimentimi i një banke në SHBA.
Por, në mungesë të Bordit, nuk ka kush të marrë vendim për tërheqje të investimeve të Trustit Pensional nga tregjet financiare ku ka rënie.
Kjo është papërgjegjësi.
Mandati i anëtarëve të Bordit të Trustit Pensional ka mbaruar më 30.11.2022, por është zgjatur edhe për 3 muaj. Konkursi është shpallur para 3 muajve më 02.12.2022, por deri më tani asnjë veprim nuk është ndërmarrë. Konkursi do të duhej të ishte shpallur disa muaj para se të mbaronte mandati i Bordit, në mënyrë që të kishte kohë të mjaftueshme për të zgjedhur Bordin e ri.
Përveç kësaj, në mungesë të Bordit, kursimet e mbledhura nga Trusti gjatë këtyre muajve nuk do të mund të investohen në tregje financiare.
Mazhoranca që qeveris me vendin e ka refuzuar projektligjin për tërheqje të mjeteve nga Trusti. Si do të përgjigjet tani?! /InLajmi/
