Siguria e përgjithshme është një element thelbësor si brenda ashtu edhe jashtë objekteve shkollore, njëkohësisht edhe element rëndësishëm për parandalimin e dukurive negative në mjediset shkollore. Por jo të gjitha shkollat e Kosovës e kanë sigurinë në nivelin e duhur, pasi pothuajse të gjithë njerëzit pavarësisht se a janë familjarë të nxënësve apo jo, kanë qasje në këto shkolla, pra njerëz të ndryshëm hyjnë e dalin pa u kontrolluar nga ndokush, shkruan InLajmi.
Shumë shkolla të Kosovës nuk kanë as rrethoja, për më tepër as punëtorë të sigurisë, e kjo vazhdimisht mbetet shqetësim si për prindërit ashtu edhe për stafin e shkollës, të cilët nuk mund të kontrollojnë gjithmonë se kush ka qasje në këto shkolla, gjë që mund ta “rrezikojë” secilin fëmijë që ndjek mësimet aty.
Një gjendje të ngjashme e kanë edhe shkollat e Prishtinës, të cilat nuk kanë roje të sigurisë, ndërsa rrethojat e shkollave shumica janë të dëmtuara.
E mungesën e sigurisë fizike në shkolla e konfirmojnë për InLajmin, zyrtarë nga Komuna e Prishtinës, të cilët thonë se punëtorë të sigurisë në shkollat e Prishtinës ka vetëm për natën, ndërsa për ditën kanë vetëm disa shkolla, e ato janë të financuara nga vetë prindërit.
Tutje, zyrtarë nga kjo komunë bëjnë të ditur se shumë shpejt do të inervenohet në rregullimin e të gjitha rrethojave të dëmtuara të shkollave.
“Të gjitha shkollat e Komunës së Prishtinës janë të rrethuara me rrethoja, por vlen të theksohet se në disa shkolla rrethojat janë të dëmtuara dhe është planifikuar që shumë shpejt të intervenohet. Persona fizik apo roje në shkolla kemi vetëm gjatë natës, ndërsa roje gjatë ditës për sigurinë e nxënësve dhe mësimdhënësve kemi vetëm në disa shkolla edhe atë janë të financuar nga vetë prindërit, si në shkollat “Sami Frashëri”, “Xhevdet Doda”, “Eqrem Çabej”, “Ahmet Gashi” dhe “Qamil Batalli” dhe “Shkëndija”.
Të pyetur nga Gazeta InLajmi, nëse do të ndërmerret ndonjë hap për shtimin e punëtorëve të sigurisë nëpër shkolla, zyrtarë nga Komuna e Prishtinës thanë se prioritet për ta ka qenë dhe mbetet siguria në shkolla, por sigurimi fizik është problem në vete. Për më tepër, ata theksojnë se komuna nuk mund të rekrutojë punëtorë të sigurisë, pasi kjo varet nga niveli qendror.
“Drejtoria e Arsimit ka prioritet në përgjithësi sigurimin në shkolla, po punon në vazhdimësi me të gjithë kapacitetin maksimal, në mënyrë që siguria e nxënësve dhe mësimdhënësve të jetë në nivelin e kënaqshëm, duke bashkëpunuar edhe me institucionet relevante përgjegjëse për siguri, për të krijuar kushte sa më optimale që në shkollat tona të zvogëlohen sa më shumë rreziqet e tilla. Gjithsesi, numri i përcaktuar i punëtorëve në arsim është tejet i vogël, prandaj edhe komuna nuk po mundet të rekrutojë roje të sigurisë nëpër shkolla sepse numri është i përcaktuar nga niveli qendror”.
Mungesa e sigurisë fizike dhe kontrolli i frekuentuesve në objektet shkollore është një problem që shqetëson Drejtorinë e Arsimit në Komunën e Prishtinës, mirëpo sipas zyrtarëve të saj, në pamundësi për të mbuluar të gjitha shkollat, fokusi ka qenë dhe vazhdon të jetë në shkollat që janë më të frekuentura, sikurse në rastin e shkollës fillore “Faik Konica”
“Po, është e vërtet se në disa shkolla edhe pse kemi rrethoja ka qasje të qytetarëve, por këto qasje janë kryesisht të komunitetit të shkollës, por në rast se drejtuesit e shkollës vërejnë apo evidentojnë se një qasje e tillë sjell rreziqe në sigurinë e nxënësve dhe mësimdhënësve atëherë në bashkëpunim me Drejtoria Komunale e Arsimit, merren hapa konkret për mbylljen e hyrjes së oborrit të shkollës. Rast të tillë kemi pasur shkollën fillore “Faik Konica”, ku duke pasur parasysh pozitën e saj në qytet e cila ka qenë e frekuentuar nga shumë qytetarë të ndryshëm që nuk kanë qenë pjesë e komunitetit të shkollës, janë ndërmarrë hapa konkret ku janë mbyllur të gjitha hyrje e daljet e shkollës”.
Në fund, nga kjo komunë theksojnë se Drejtoria Komunale e Arsimit për ruajtjen e sigurisë nëpër shkolla ka planifikuar që të ndajë buxhet dhe të investojë në riparimin e rrethojave, gjithashtu edhe në instalimin e kamerave monitoruese.
“Në mënyrë që siguria të jetë në nivel të kënaqshëm Drejtoria e Arsimit ka planifikuar dhe ka ndarë buxhet që në vazhdimësi të investojë dhe intervenojë në rrethoja, ka planifikuar në projekte për instalimin e kamerave monitoruese në të gjitha institucionet edukativo-arsimore dhe vazhdon me projekte të tilla, në mënyrë që siguria në shkolla të jetë në nivelin e duhur”.
Këtë shqetësim si Prishtina e ndajnë edhe shumë komuna të tjera të Kosovës, ku shkollave të tyre ju mungojnë rrethojat, por zgjidhja mbetet gjithsesi brenda secilës komunë për objektet që i menaxhojnë. Shqipe Vishaj /InLajmi/
