Shprehjet “bandit, idiot, hajn, tradhtar” janë bërë mjaft të shpeshta seancat e Kuvendit të Kosovës, gjë që ka ngritur shqetësimin për normalizimin e gjuhës denigruese në këtë institucion shtetëror nga ata të cilët përfaqësojnë popullin, shkruan InLajmi.
Këto shprehje pavarësisht kritikave nga brenda e jashtë vazhdojnë të përdoren nga përfaqsuesit e qytetarëve në legjislativ, por veprime institucionale për “ndëshkimin” e kësaj gjuhe nuk janë parë deri më më tani.
Mirëpo “hajrin” kësaj gjuhe denigruese duket se ia kanë parë përdoruesit e faqeve të ndryshme në rrjete sociale ku deklarata e deputetëve i kanë “shndërruar” në meme nga më të ndryshme.
Pra gjuha e përdorur në Kuvend nga deputetët është e papranueshme për gjithë opinionin, ndërsa sociologu Bekim Selishta në një deklaratë për InLajmin, thotë se deputetët me gjuhën fyese, denigruese të përdorur gjatë debateve në seanca i kanë tejkaluar standardet e komunikimit të shëndosh.
“Unë e di që është një standard brenda kuvendit që duhet të përdoret, është gjuhë parlamentare që duhet me u përdor, që është standard i komunikimit. Por sipas meje ata këtë standard e kanë kaluar, ai nuk duhet të kalohet por fatkeqësisht ata e kanë kaluar”, tha Selishta për InLajmin.
Sipas tij, përdorimi i gjuhës denigruese, në raste edhe kërcënuese nga ana e deputetëve në seanca, reflekton negativisht tek opinion me theks tek moshat e reja që mund të ndikohen nga ajo gjuhë jo standarde.
Se gjuha denigruese, fyese e përdorur nga deputetët në seanca parlamentare ndikon negativisht në opinion dhe mund të nxis edhe reagime në terren e thotë edhe analisti politik, Drizan Shala.
Sipas tij, veprimet e simpatizantëve në terren të nxitura nga gjuha komunikuese ndërmjet deputetëve në raste denigruese e fyese, cenon sigurinë e përgjithshme.
“Gjuha që kemi hasur këtyre ditëve e dëshmon që kjo mund të nxisë veprime në terren ndaj simpatizuesve duke cenuar sigurinë e përgjithshme”, deklaroi Shala. /InLajmi/
