Presidenti i Serbisë, Aleksandar Vuçiq, ka deklaruar se gjithçka që është nënshkruar në dialogun ndërmjet Kosovës dhe Serbisë e firmosur edhe nga përfaqësuesit e Bashkimit Evropian, duhet të zbatohet, transmeton InLajmi.
Ndërsa sa i përket Asociacionit të Komunave Serbe, Vuçiq tha se nën patronatin e BE-së, janë nënshkruar 4 marrëveshje plani i zbatimit, parimet, menaxhmenti dhe Marrëveshja e Parë.
“Këto janë 4 marrëveshje. Ne tashmë kemi nënshkruar gjithçka dhe natyrisht se aty janë edhe nënshkrimet e përfaqësueseve të BE-së dhe ato duhen zbatuar, por ky nuk është qëllimi përfundimtar. Qëllimi përfundimtar është që serbët dhe shqiptarët të jetojnë së bashku, të jetojmë shumë më mirë dhe të respektojmë njëri tjetrin pa armiqësi. Nuk kam në plan të flas se kush ka faj, prandaj është më pak e rëndësishme nëse kjo arrihet për 3 muaj apo për 3 vjet, por nëse ia dalim do të jetë sukses historik”, ka thënë Vuçiq në një intervistë për Ewronews në gjuhën angleze.
I pyetur nëse po përgatitet për një raund të ri të bisedimeve me përfaqësuesit e Kosovës dhe cilat janë “vijat e kuqe”, presidenti i Serbisë tha se nuk dëshiron të flasë shumë për vijat e kuqe, sepse nëse flitet shumë për atëherë nuk ka negociata reale dhe “pala tjetër do të insistojë vetëm në ato vija të kuqe”.
Është më e rëndësishme, shtoi ai, të flasim siç duhet, dhe kjo “do të thotë të përpiqesh të gjesh zgjidhje kompromisi”.
“Ne jemi të gatshëm ta bëjmë këtë. Sigurisht që të 2-ja palët kanë vijat e tyre të kuqe dhe nuk mund ta mohoj këtë, por ne, të 2-ja palët, duhet të duhet të bëjmë shumë për të normalizuar situatën mes kombeve tona, popujve tanë dhe duke e pasur parasysh këtë besoj se kjo është në interes të të 2-ja palëve edhe sigurimi i qarkullimit i lirë i mallrave, njerëzve dhe kapitalit. Duhet të punojmë me përkushtim në këtë drejtim sikur edhe për zbatimin e të gjitha marrëveshjeve të mëparshme”, u shpreh Vuçiq.
I pyetur nëse Serbia është e gatshme t’i bëjë disa lëshime ndaj palës kosovare kur bëhet fjalë për anëtarësimin në Këshillin e Evropës apo të paktën të fillojë atë procedurë, Vuçiq tha se ata “tashmë e kanë filluar atë procedurë në Këshillin e Evropës, pa pyetur Serbinë dhe se nuk iu duhet Serbia për këtë”. Megjithatë, ai nënvizoi se ka rregullore dhe një plan të propozuar nga gjermanët dhe francezët në lidhje me organizatat ndërkombëtare. /InLajmi/
