Presidenti i Qendrës për Marrëdhënie Ndërkombëtare dhe Zhvillim të Qëndrueshëm (CIRSD) Vuk Jeremiq tha sot në Baku se Serbia duhet t’i rezistojë fuqishëm dhe me guxim presioneve për të pranuar pavarësinë e Kosovës, transmeton InLajmi.
“Serbia duhet të marrë mësim nga përvoja e Azerbajxhanit, sovraniteti i të cilit gjithashtu u vu në pikëpyetje në Nagorno-Karabakh ku u përball me propozime të pafavorshme për zgjidhjen e kësaj çështjeje, por Baku nuk pranoi asnjë nga ato propozime,” tha Jeremiq, gjatë një ligjërate me temën ” Gjeopolitika e Ballkanit dhe lidhja e saj me Ballkanin”, në Universitetin ADA.
I pyetur për propozimin franko-gjerman për Kosovën, Jeremiq, tha se Sebia është nën presion për të pranuar pavarësinë e Kosovës, ndërsa thekson se nuk duhet të nënshkruhet marrëveshja për zbatimin e planit evropian.
“Unë e kundërshtoj fuqishëm nënshkrimin e asaj marrëveshjeje, sepse do të shkaktonte pasoja negative afatgjate. Marrëveshja parasheh barazinë e Serbisë dhe Kosovës, e gjithashtu me atë plan Serbia nuk duhet të pengojë anëtarësimin e Kosovës në organizatat ndërkombëtare”, tha Jeremiq.
Sipas tij, nëse Kosova bëhet anëtare e OKB-së, hapi tjetër do të ishte krijimi i një shteti të vetëm shqiptar që do të përfshinte territorin e Shqipërisë dhe Kosovës, e që do të hapte “Kutinë e Pandorës” dhe kjo shkakton destabilizim të situatës në rajon.
Jeremiq tha se Rusia dhe Kina, të cilat kanë të drejtën e vetos në Këshillin e Sigurimit të OKB-së, mbështesin qëndrimin e Serbisë për të mos njohur Kosovën, por tha Jeremiq se nëse Serbia ndryshon qëndrimin e saj për integritetin e saj territorial, nuk mund të presë nga Moska e as nga Pekini që të bëhen “më serbë se serbët”, u shpreh Jeremiq./InLajmi/
