Deputeti i Partisë Demokratike të Kosovës, Xhavit Haliti tha se nëse brenda marsit nuk nënshkruhet marrëveshja me Serbinë do të krijohen situata të paparashikueshme në veri të vendit.
Madje, Haliti tha se e sheh rrezikun që serbët ta shpallin autonominë në veri të Kosovës.
“Në qoftë se nuk nënshkruhet kjo, shoh rrezikun që t’i hapet mundësia për ta shpallur autonominë në veri dhe për të krijuar situata të paparashikueshme. Nuk dua të spekuloj publikisht për disa gjëra që mund t’i dijë, ose mund të kem informacione. Por, unë shoh rrezik permanent, s’do të thosha konflikt të madh, por konflikte të paparashikueshme, veçanërisht në veri në qoftë se nuk realizohet kjo brenda marsit”, deklaroi Haliti në emisionin “Këndi i Debatit” në Tëvë1.
Më 18 mars do të jetë një takim në mes të kryeministrit të Kosovës, Albin Kurti dhe presidentit serb, Aleksandar Vuçiq, ku do të diskutojnë planin e zbatimit që është pjesë integrale e propozimit evropian.
