Lumir Abdixhiku në 2 vjetorin e zgjedhjes së tij si kryetar i LDK-së, ishte i nderuar që në selinë e tij të pres në takim familjen e ish-presidentit historik, dr. Ibrahim Rugova, përcjell InLajmi.
Me këtë rast, lideri Abdixhiku shprehet tejet i emocionuar nga kjo vizitë e aq më tepër kur zonja Fana i dhuroi atij kristalet që presidenti Rugova i kishte dhuruar atëbotë, Presidentit Clinton, Papa Gjon Palit si shenjë Kosovë.
Ndërsa diskutuan mes emocioneve për rrugëtimin e LDK-së në dyvjeçarin e fundit, Abdixhiku theksoi se ishin këto vite të qëndresës, rikthimit dhe rritës së fuqisë politike.
Ai shtoi se LDK-ja është e fortë idetë e kësaj partie janë të kohës dhe se e shkuara e LDK-së është historike, kurse tha ai të ardhmen e bëjmë vet ne.
Postimi i plotë i tij:
2 vjet më parë, delegatët e Kuvendit të LDK-së, më dhanë përgjegjësinë dhe njëkohësisht nderin më të madh jetësor, atë të udhëheqjes së formacionit të parë pavarësist e demokratik në Kosovë, shtëpisë së madhe të Lidhjes Demokratike të Kosovës.
Në këtë përvjetor të 2, u nderova nga vizita e zonjës Fana Rugova, bashkëshortes së Presidentit Rugova, dhe vajzës së tij Teutës e djalit Ukës. Ishte kjo vizita e parë e zonjës Fana në selinë qendrore të partisë.
Nga zonja Fana pranova dhe një dhuratë tejet të çmueshme e domethënëse për mua; një kristal guri; të njëjtin që Presidenti Rugova e mbante për më të veçantë, atë që e kishte dërguar tek Presidenti Klinton e Papa Gjon Pali i 2 të, si shenjë Kosove. Mes emocionesh e kujtimesh të shumta mbi gjithë historinë e familjes sonë politike, i njoftova për punët tona tani.
2 vitet e shkuara shënuan rikthimin e madh të Lidhjes sonë. E nisëm në një moment të vështirë; dëgjuam, ndryshuam, vepruam mbarë. Qëndruam fort, ecëm drejtë e treguam përgjegjësi për vendin në çdo hap tonin. Mes nevojës së pashmangshme për hapje e reformë, gjetëm dhe unitetin e brendshëm e përfaqësimin e denjë jashtë. Nderuam të shkuarën, por vendosëm të ndërtojmë të ardhmen. Prandaj fituam zgjedhjet lokale; fituam më të rëndësishmen për ne – besimin e qytetarëve tanë.
Sot, LDK ka rigjetur veten mes njerëzve të shkëlqyeshëm të këtij vendi. Ka rigjetur veten mes veprimtarëve e veprimtareve që vazhdojnë të ndërtojnë rrugën e nisur 33 vjet më parë nga patriotë të mëdhenj të kohës. Kjo rrugë gjithsesi s’bëhet më e lehtë, e me çdo rritje tonën ajo bëhet edhe me më shumë përgjegjësi. Por kjo rrugë e jona mbetet e paalternativë. Lidhja është e fortë. Idetë tona janë të kohës. E shkuara jonë është historike. Të ardhmen do ta bëjmë vet ne. Dhe kjo e ardhme është e bukur.
Sepse Kosova meriton më mirë.
Sepse Kosova mundet më shumë. /InLajmi/
