Më 18 mars, kryeministri i Kosovës Albin Kurti dhe presidenti serb Aleksandar Vuçiq do të takohen në Ohër të Maqedonisë së Veriut në kuadër të dialogut të ndërmjetësuar nga Bashkimi Evropian. Zyrtarët vendorë dhe ndërkombëtarë presin që në takimin e Ohrit të arrihet pajtim për planin e zbatimit të propozimit evropian, shkruan InLajmi.
Si problematikë e këtij takimi po shihet formimi i Asociacionit të komunave me shumicë serbe, e cila është vendosur si parakusht nga Serbia për ta pranuar planin franko-gjerman, por jo vetëm. I dërguari special i BE-së për dialogun ndërmjet Kosovës dhe Serbisë, Miroslav Lajçak, këtë të martë ka theksuar edhe një herë se nuk do të ketë marrëveshje në takimin e Ohrit nëse nuk formohet Asociacioni ndërsa kryeministri i vendit Albin Kurti ka shprehur qartë qëndrimin e tij se nuk do ta formojë Asociacion një etnik.
Analisti Fidan Ukaj në një deklaratë për InLajmin thekson se Asociacioni do të jetë pika kyçe që mund ta dështojë arritjen e një marrëveshjeje mes Kosovës dhe Serbisë në takimin e Ohrit, pasi siç thotë ai, Serbia e ka vendosur këtë parakusht për ta pranuar planin franko-gjerman.
“Mendoj se nuk do të ketë dakordim nga ana e Serbisë me datën 18 mars në Ohër, sepse ajo është barrikaduar në formimin e Asociacionit të komunave me shumicë serbe si parakusht për ta pranuar marrëveshjen në tërësi planin franko-gjerman, për çka mendoj se Asociacioni është vetëm pretekst i Serbisë për të mos u arritur marrëveshja, pasi formimi i këtij Asociacioni nuk është se do ta rregullojë mirëqenien e qytetarëve serbë në Kosovë, por se Serbia po e përdor si pretekst, pasi Kosova është e barrikaduar që formimi i këtij Asociacioni nuk do të ndodhë, por në një fazë më të vonshme e në kuadër të marrëveshjes franko-gjermane e assesi si parakusht”, tha Ukaj për InLajmin.
Ukaj konsideron se Serbia nuk është e interesuar të arrijë marrëveshje finale me Kosovën, prandaj ajo po vazhdon të ndërmarrë veprime destruktive.
“Pikërisht Asociacioni do të jetë pika kyçe që mund ta dështojë arritjen e një marrëveshje Kosovë-Serbi, pasi Serbia po e përdor si lojë të saj për të mos e arritur marrëveshjen finale me Kosovën. Serbia nuk është e interesuar të këtë marrëveshje me Kosovën, prandaj edhe bën këso veprimesh destruktive, të cilat i ka bërë në vazhdimësi”, tha Ukaj.
Nga ana tjetër, analisti Blerim Gashi shprehet më optimist sa i përket arritjes së marrëveshjes me Serbinë në takimin e Ohrit.
Gashi në një deklaratë për InLajmin thekson se rruga drejt arritjes së marrëveshjes me Serbinë është evidente dhe nuk sheh ndonjë hapësirë të vonimit apo të tërheqjes së ndonjërës palë.
“Ndërsa janë dorëzuar modelet e Asociacionit dhe drafti udhërrëfyes i lanit të veprimit dhe sipas deklarimit të kryeministrit Kurti mbetet shqyrtimi i modeleve të Asociacionit, rruga drejt arritjes së një dakordimi si të ecet tutje në implementim e marrëveshjes bazë është evidente dhe nuk shoh asnjë hapësirë vonimi apo tërheqje të asnjërës palë”, tha Gashi për InLajmin.
Për më tepër, Gashi thekson se çështja e Asociacionit nuk do të jetë pengesë e pakapërcyeshme në arritjen e një marrëveshje për normalizimin e raporteve mes Kosovës dhe Serbisë.
“Potenciali që Asociacioni i paramenduar si produkt i marrëveshjes së dëmshme të vitit 2013, i cili është parakusht i Serbisë mund të shkaktojë diskutime të rënda mes palës serbe dhe ndërmjetësuesve, por nuk parashoh që do të paraqesë pengesë të pakapërcyeshme për normalizim në këtë fazë”, tha Gashi.
Ndryshe, Bashkimi Evropian u ka bërë thirrje Kosovës dhe Serbisë që të mos e lëshojnë momentumin për arritjen e një marrëveshjeje për harmonizimin e marrëdhënieve e cila do iu hap rrugë drejt perspektive evropiane të 2 vendeve. /InLajmi/
