Kontrata ishte nënshkruar para një jave e punimet për restaurimin e objektit të Gjimnazit të vjetër “Ismail Qemali’ në Ferizaj kishin filluar këtë të hënë, përcjell InLajmi.
Mirëpo puna nuk zgjati shumë, kjo pasi në orët e para të mëngjesit persona të panjohur ia vunë flakën ndërtesës së shkollës ku kishin filluar punimet.
E rastin për djegie e konfirmoi edhe Policia e Kosovës në një përgjigje me shkrim për InLajmin, ndërsa zyrtarët policorë njoftuan se pas marrjes së informacioneve ekipet e zjarrfikësve e policëve kanë dalë në vendin e ngjarjes.
“Sot, rreth orës 04:25 kemi pranuar një informatë se në një objekt shkolle të vjetër, jo funksionale në rrugën “Ramadan Rexhepi” është një incident zjarri. Zjarri është lokalizuar dhe veç dëmeve materiale nuk është raportuar për të lënduar”, u deklaruan nga Policia.
Gjithashtu nga Policia e Kosovës bëhet e ditur se Drejtori Rajonal i Policisë së Rajonit të Ferizajt , Nënkoloneli Basri Shabani ka marrë vendim për formimin e një ‘’Task-Forca’’ për hetim të rastit në nivel rajonal.
“Duke pas parasysh rëndësinë e rastit të incidentit të zjarrit të Gjimnazit të Vjetër “ Ismail Qemali” në Ferizaj, se objekti i takon trashëgimisë kulturore, Drejtori Rajonal i Policisë së Rajonit të Ferizajt , Nënkoloneli Basri Shabani ka marrë vendim për formimin e një ‘’Task-Forca’’ për hetim të rastit në nivel rajonal nga Sektori Rajonal i Hetimeve, të cilët nën autorizim të prokurorit kujdestar nga Prokuroria Themelore e Ferizajt janë duke i zhvilluar hetimet”, thuhet tutje në përgjigjën e Policisë së Kosovës për Gazetën InLajmi.
Ndryshe për djegien e objektit reagoi edhe Ministri i Kulturës, Rinisë dhe Sportit, Hajrullah Çeku i cili tha se ky është një krim.
Ministri u shprehe i shqetësuar për zjarrin e shpërthyer në objekt, por premtoi se Gjimnazi i vjetër “Ismail Qemali’ në Ferizaj do të restaurohet, i pëlqeu apo jo keqbërësve. /InLajmi/
