Udhëheqësi kinez Xi Jinping siguroi të premten një mandat të 3-të 5-vjeçar, gjë që i hap rrugën qëndrimit të tij të përjetshëm në pushtet, në një kohë sfidash të vështira ekonomike dhe tensionesh në rritje me Shtetet e Bashkuara dhe fuqi të tjera.
Mbështetja për një mandat të 3-të nga Kongresi Kombëtar Popullor ishte e pritshme për një udhëheqës që i ka larguar nga skena rivalët e mundshëm dhe ka mbushur rangjet e Partisë Komuniste në pushtet me përkrahësit e tij që kur mori pushtetin në vitin 2012.
Kongresi, anëtarët e së cilit emërohen nga partia në pushtet, votoi për Xi me 2.952 vota pro dhe asnjë kundër.
69 vjeçari Xi e kishte emëruar veten për një mandat të 3-të 5-vjeçar si sekretar i përgjithshëm i partisë në tetor, duke thyer një traditë sipas së cilës udhëheqësit kinezë e dorëzonin pushtetin pas një dekade. Kufizimi prej 2 mandatesh për presidencën që parashikohej në Kushtetutën kineze u eliminua, duke nxitur zërat se Xi mund të qëndrojë në pushtet përgjithmonë.
Në kongres nuk pati ndonjë listë kandidatësh dhe mesa duket udhëheqësi kinez dhe figura të tjera që u zgjodhën nuk patën asnjë konkurrencë për postet.
Procesi është pothuajse tërësisht i fshehtë.
Xi u emërua gjithashtu unanimisht si komandant i Ushtrisë Çlirimtare Popullore prej 2 milionë anëtarësh, një forcë që i merr urdhrat nga partia, shkruan VOA.
Mandati i ri i Xi dhe emërimi i personave besnikë ndaj tij në postet kryesore nxjerr në pah monopolin e tij pothuajse të plotë mbi pushtetin politik kinez, duke eliminuar çdo kundërshtim të mundshëm ndaj programit të tij ultra-nacionalist për ta pozicionuar Kinën si rivalen kryesore politike, ushtarake dhe ekonomike të Shteteve të Bashkuara dhe kundërshtaren kryesore autoritare ndaj rendit botëror demokratik të udhëhequr nga Uashingtoni.
