Emisari special i Bashkimit Evropian për dialogun Kosovë-Serbi, Miroslav Lajçak të enjten dhe të premten ka qëndruar në Kosovë ndërsa është takuar me udhëheqësit institucionale dhe liderët e subjekteve politike opozitare, shkruan InLajmi.
Kjo vizitë e emisarit evropian në Kosovë, vazhdon me vizitën në Serbi, vjen disa ditë para takimit Kurti-Vuçiq që do të mbahet në Ohër me 18 mars e ku pritet të arrihet një marrëveshje për zbatimin e planit e franko-gjerman për normalizimin e marrdhënieve Kosovë-Serbi.
Se vizita e emisarit evropian në Kosovë e Serbi nuk është rastësore, e thotë për Gazetën InLajmi analisti politik Fidan Ukaj i cili thekson se Lajçak po qëndron në rajon dhe po zhvillon takime të ndara me pushtetarët dhe opozitarët për tu njohur me qëndrimet e zyrtarëve të 2 shteteve për tu njohur rreth modaliteteve për zbatimin e planit evropian.
“Zoti Lajçak vjen në rajon, në Kosovë e me pas edhe shkon në Serbi për ti dëgjuar palët rreth modaliteteve për zbatimin e planit te BE-së”, deklaroi Ukaj për InLajmin.
E për nënshkrimin e një marrëveshje me 18 mars në Ohër të Maqedonisë në mes Kosovës dhe Serbisë Ukaj u shpreh skeptik.
“Jam skeptik sa i përket mundësisë se arritjes se një marrëveshje me datë 18 mars për arsye se Serbia ka qenë dhe mbetet destruktive, ajo (Serbia) prapë do ta përdorë formimin e Asociacionit si pretekst për të mos arritur një marrëveshje me Kosovën duke e prezantuar si kusht të saj për të arritur marrëveshje me Kosovën”, u shpreh analisti Ukaj.
Ndryshe me 27 Shkurt në Bruksel pala kosovare dhe ajo Serbe u dakorduan për propozimin evropian, i cili hap rrugë për normalizimin e marrëdhënieve në mes 2 vendeve.Jo gjatë kohë nga takimi i lartëcekur, Bashkimi Evropian ka caktuar takimin e radhës Kurti –Vuçiq më 18 mars i cili do të mbahet në Ohër të Maqedonisë së Veriut. /InLajmi/
