Drejtori i Zyrës për Kosovë në Kuvendin e Serbisë, Petar Petkoviq, ka thënë të premten se deklarata e kryeministrit të Kosovës, Albin Kurti se nuk do të formojë Asociacionin e Komunave Serbe, tregon qasjen jodemokratike, autokratike dhe antiserbe të pushtetit në Kosovë, transmeton InLajmi.
Në deklaratën me shkrim, Petkoviq ka thënë se Kurti mund të “thotë çfarë të dojë”, por deklaratat e tij nuk e zbehin obligimin ligjor që ka Kosova, respektimin dhe zbatimin e marrëveshjeve të arritura, fillimisht formimin e Asociacionit.
“Kurti nuk do të deklaronte kështu nëse nuk do të kishte mbështetjen e disa vendeve perëndimore. BE-ja mund ta shpërblejë Kosovën me liberalizimin e vizave, por një gjë është e sigurt se Serbia e udhëhequr nga presidenti Vuçiq nuk do ta njohë kurrë pavarësinë e Kosovës dhe kurrë nuk do të pajtohet me anëtarësimin e Kosovës në OKB”, tha Petkoviq, shkruan Danas.
Kurti më herët ka thënë se nuk do ta përmbushë kërkesën e Serbisë për formimin e Unionit të Komunave Serbe, edhe pse është në përputhje me Marrëveshjen e Brukselit.
“Unë jam këtu si kryeministër i të gjithë qytetarëve, pavarësisht nga identiteti i tyre kombëtar, përkatësia kombëtare apo fetare. Prandaj, dua t’i kënaq të gjithë qytetarët sipas të drejtave, nevojave dhe kërkesave të tyre. Për shkak të rendit juridik të republikës sonë demokratike, zgjidhjet njëkombëshe nuk janë të mundshme”, ka thënë Kurti.
Kujtojmë se të enjten e të premten në Kosovë ka qëndruar emisari evropian Miroslav Lajçak i cili është takuar me liderët shtetëror dhe me krerët e opozitës, ndërsa do të vazhdojë vizitën në Serbi ku fillimisht do të takohet me udhëheqësit institucional./InLajmi/
