Kryetari i Partisë Demokratike të Kosovës, Memli Krasniqi, në një seancë për medie është deklaruar pas takimit me emisarin e Bashkimit Evropian Miroslav Lajçak, raporton InLajmi.
Krasniqi theksoi se Partia Demokratike e Kosovës nuk voton pro marrëveshjes me Serbinë pa e pasur brenda njohjen reciproke.
Kryetari i PDK-së akuzon kryeministrin Kurti për humbjen e mundësisë për njohjen reciproke.
“Sapo zhvilluam një takim miqësor dhe të hapur me emisarin Lajçak, me të cilin biseduam për procesin e dialogut dhe marrëveshjen. Lajçakut ia shpreha edhe qëndrimet e PDK, rezervat që kemi për këtë marrëveshje. Fatkeqësisht ajo që sot kemi në tavolinë është një marrëveshje pa njohje dhe me Asociacion në qendër. Përgjegjësia e Kurtit është direkte për faktin që për 2 vite e ka humbur mundësin që t’i bindë mbështetësit tanë për ta arritur njohjen e ndërsjelltë. Sot nuk kemi një marrëveshje gjithëpërfshirëse, jo me njohje, marrëveshje të përkohshme. Këto qëndrimet tona nuk janë befasuese për partnerët ndërkombëtarë. Qëndrimi i PDK-së që nga vitit 2018 është i lidhur me njohje të ndërsjellët. Krijon një status-quo të re. Qëndrimi i PDK në e shohim marrëveshjen si të pamjaftueshme dhe që krijon edhe shumë pikëpyetje”, thotë Krasniqi.
Krasniqi tha se edhe nëse sillet në Kuvend marrëveshja pa njohje reciproke nuk do ta ketë votën e PDK-së.
“Pa dyshim që qëndrimi i SHBA nuk ka ndryshuar, ata besojnë që përfundim të jetë me njohje në qendër. Prej njohjes së ndërsjellë kemi njohjen eventuale. Ky është shqetësimi jonë. Është obligim që të sillet në Kuvend. Kurdo që të sillet në Kuvend nëse është ky aneks nuk do ta ketë votën e PDK. Por do ta shohim marrëveshjen finale”, tha tutje Krasniqi. /InLajmi/
