Kryetari i Shtërpcës, Dalibor Jevtiq, beson se tani është koha e duhur “për t’i zgjidhur disa çështje dhe probleme të caktuara” ndërmjet Kosovës dhe Serbisë, transmeton InLajmi.
Kështu është shprehur Jevtiq, të mërkurën në Zagreb, ndërsa ka theksuar se SHBA-ja e as Bashkimi Evropian nuk lejojnë ndonjë krizë të re, prandaj edhe kërkojnë zgjedhjen e problemeve në këtë pjesë evropiane.
Tutje ka theksuar Jevtiq se dialogu nuk ka alternativë dhe se propozimi evropian “nuk është i lehtë për asnjërën palë”.
“Ne mund të jetojmë normalisht, pa presion politik dhe ngarkesa politike. Gjithmonë theksoj se duhet ta mbështesim çdo proces, sado i vështirë të jetë, që do të sjellë paqe, stabilitet dhe jetë normale”, tha Jevtiq.
Jevtiq tha se fillimisht presim që përmes Marrëveshjes Evropiane të zbatohen marrëveshjet e arritur më parë për të vazhduar pastaj me dialogun.
Sipas tij BE-ja dhe SHBA-ja e kanë parasysh rrezikun nga një konflikt potencial në këtë pjesë prandaj edhe duan intensifikimin e dialogut për arritjen e një marrëveshje mes Kosovës dhe Serbisë.
“Kohët e fundit isha në Washington dhe bisedova me të dërguarin special amerikan për Ballkanin Perëndimor, Gabriel Escobar dhe zyrtarë të tjerë dhe ndjeva një vendosmëri të madhe që Washingtoni duhet të hyjë në këtë proces me një qëllim shumë të qartë, që është ta ndalojë zvarritjen dhe të fillohet jo vetëm me marrëveshje, por me zbatimin e asaj që është rënë dakord”, tha Jevtiq, shkruan Tv Most.
Duke komentuar çështjen e Asociacionit Jevtiq tha se me këtë synohet sigurimi i popullit serb përmes organizimit institucional dhe shtoi se asociacioni nuk do të jetë monoetik, siç pretendon kryeministri i Kosovës a Albin Kurti.
“Asociacioni nuk do të jetë monoetike, përmenda Shtërpcën, ka komuna të tjera ku jetojnë komunitete dhe popuj të tjerë, si Novobërda, Graçanica, Mitrovica e Veriut, ku jetojnë shqiptarët, boshnjakët dhe popuj të tjerë”, deklaroi Jevtiq./InLajmi/
