Deputeti i Lidhjes Demokratike të Kosovës Avdullah Hoti, ka shprehur shqetësimin për importimin e qymyrit nga Serbia, përcjell InLajmi.
Hoti thotë se Kosova është e mbushur me qymyr, por pavarësisht kësaj qymyri po importohet 3 herë më shtrenjtë nga Serbia.
Ai njofton se qymyri i importuar nga Serbia ka ardhur me një çmim prej 200 eurosh derisa thekson se më herët nga “Kosova Thëngjilli”, ky qymyr është blerë për vetëm 60 euro.
Hoti shtron pyetjen ironike drejtuar institucioneve: “Për kur po e ruajmë qymyrin”.
Për më tepër, deputeti kërkon që Kosova të bëhet vend që eksporton qymyr në vende të ndryshme të botës, pasi siç thekson ai, tani kërkesa për shkak të krizës energjetike çdokund është e madhe.
Postimi i plotë i tij:
Flemë mbi qymyr, por importojmë qymyr.
Një numër i bizneseve në Kosovë e përdorin qymyrin për ngrohje të hapësirave të punës apo në teknologjinë e prodhimit. Zakonisht këto biznese qymyrin e kanë blerë nga ndërmarrja “Kosova Thëngjilli”, e cila funksionin si shoqëri aksionare. Kjo ndërmarrje e ka blerë qymyrin nga KEK-u, e ka përpunuar atë dhe ua ka shitur bizneseve ose e ka eksportuar.
Kontrata e kësaj ndërmarrje me KEK-un nuk është aktive. Punëtorët e saj janë pa të ardhura. Sot bizneset private detyrohen të importojnë qymyr nga jashtë. Së paku 6 milion euro qymyr janë importuar vitin e kaluar. Qymyri është importuar edhe nga Serbia, me çmim prej 200 euro për ton, krahasuar me 60 euro për ton nga “Kosova Thëngjilli”.
Për kur po e ruajmë qymyrin?
Çfarë strategjie është kjo?
Pse duhet bizneset të blejnë qymyr tri herë më shtrenjtë nga Serbia e nga vendet e tjera?
Pse të mos eksportohet qymyri kur tani ka kërkesë nga disa vende për shkak të krizës energjetike? /InLajmi/
