Kryetari i Partisë Demokratike Memli Krasniqi, ka takuar deputetet, anëtaret e kryesisë, kryesueset e kuvendeve komunale dhe nënkryetaret e komunave nga radhët e PDK-së për nder të Ditës Ndërkombëtare të Gruas, përcjell InLajmi.
Krasniqi i falënderoi pjesëtaret e partisë për angazhimin dhe shembullin e përditshëm që japin në fuqizimin e rolit të gruas në shoqëri.
Ai theksoi se gratë në Kosovë ballafaqohen akoma me sfida dhe vështirësi nga më të ndryshmet.
Krasniqi u shpreh i lumtur që PDK ka marrë vendimin për të zbatuar barazi të plotë gjinore, 50/50, në të gjitha nivelet e udhëheqjes dhe vendimmarrjes në parti.
Postimi i plotë i tij:
Në Ditën Ndërkombëtare të Gruas – takova sot koleget e PDK-së të cilat kanë pozicione udhëheqëse, deputetet, anëtaret e Kryesisë, Kryesueset e Kuvendeve Komunale dhe Nënkryetaret e Komunave, të cilat i falënderova për angazhimin dhe shembullin e përditshëm që japin në fuqizimin e rolit të gruas në shoqëri.
Megjithëse kjo është një ditë kushtuar festimit të arritjeve sociale, ekonomike, kulturore dhe politike të grave – është edhe një përkujtim se misioni për barazi gjinore nuk ka mbaruar dhe kërkon ende shumë punë për t’u bërë.
Përkundër përpjekjeve të vazhdueshme, gratë në Kosovë ballafaqohen akoma me sfida dhe vështirësi nga më të ndryshmet, për të cilat është tejet e rëndësishme që të vazhdojmë t’i mbështesim.
Pikërisht për këto arsye, jam tejet i lumtur dhe krenar që si Kryetari i Partisë Demokratike të Kosovës, për herë të parë në Kosovë dhe rajon, kemi marrë vendimin për të zbatuar barazi të plotë gjinore, 50/50, në të gjitha nivelet e udhëheqjes dhe vendimmarrjes në parti.
Inkurajimi i pjesëmarrjes së grave në politikë dhe në udhëheqje është thelbësor për fuqizimin e rolit të gruas dhe barazisë gjinore. Kur gratë kanë përfaqësim të barabartë në udhëheqje, zëri i tyre dëgjohet më shumë dhe nevojat e tyre adresohen. Përmes këtij vizioni, ne do të përkushtohemi që të krijojmë politika dhe veprime më të mira që promovojnë dhe avancojnë të drejtat e grave.
Vetëm duke fuqizuar gratë përmes arsimit, kujdesit shëndetësor, mundësive ekonomike, ndryshimit të qëndrimeve shoqërore dhe promovimit të lidershipit politik dhe ekonomik, gratë mund të përmbushin potencialin e tyre të plotë dhe të shtojnë ndikim e madh pozitiv që mund ta kenë për shoqërinë dhe shtetin.
Po, ka ende shumë punë për t’u bërë – Po, jemi të vendosur që këtë punë ta bëjmë së bashku. /InLajmi/
