25 vite më parë muret e kullave të familjes Jashari i bënë ballë granatimeve të forcave serbe, ndërsa tani ato bartin një histori të tërë, historinë e lavdisë dhe sakrificës së familjes së komandantit Adem Jashari, aty ku zë fill edhe rruga drejt lirisë, shkruan InLajmi.
Këto kulla i qëndruan granatimeve, por nuk e di edhe për sa kohë muret që bartin historinë e re të Kosovës do i mbijetojnë “egërsisë” së natyrës, reshjeve të shiut, borës, acarit. Nëse i qëndruan granatave, shpresojmë të qëndrojnë fortë edhe deri atëherë kur institucioneve të Kosovës do i’u bie ndërmend se duhen mbrojtur ato mure që janë lavdia, mburrja e krenaria jonë.
Vitet ikin në heshtje, ndërsa kaluan 25 vite, por historia e lavdisë mbetet e “hirtë”, pa shkëlqimin që duhej ta kishte sikur ato mure të kullave ikonë e lirisë dhe pavarësisë të koservoheshin me kohë e mos të jenë në gjendje mjerimi në prag të rrënimit.
Që është neglizhuar restaurimi dhe konservimi i Kullave të familjes Jashari e konfirmoi edhe drejtori i Agjencisë për Menaxhimin e Komplekseve Memoriale, Bislim Zogaj.
Zogaj për gazetën InLajmi nuk ka dhënë ndonjë arsye të fortë për vonesat në restaurimin dhe konservimin e kullave të familjes Jashari, ndërsa sipas tij e vetmja arsye mund të jetë frika për të filluar me projektin duke mos e parë si të dinjitetshëm.
“Në këto 4 vitet e fundit them se neglizhenca për fillimin e punëve në restaurimin e kullave në komisionet ndërministrore të formuara nga qeveritë e kaluar dhe kjo e fundit ka mbizotruar frika e mos arsyetimit të vonesave me ndonjë projekt të dinjitetshëm. Kjo besoj ka qenë arsyeja, përndryshe mjetet financiare nuk kanë munguar në asnjë rast”, tha Zogaj për InLajmin.
Ndërsa sipas deputeti të Kuvendit të Kosovës nga radhët e PDK-së, Bekim Haxhiu, fajin për mos fillimin e restaurimit të kullave të familjes Jashari e hedh tek ndryshimi i qeverive që pasonte edhe me ndryshimin e Komisionit ndërministror.
“Por prej atëherë e deri me sot disa herë është ndryshuar Komisioni Ndërministror për shkak të ndryshimit te Qeverive, prandaj edhe projekti nuk është përfunduar ende”, tha Haxhiu në një përgjigje me shkrim për Gazetën InLajmi.
Mirëpo pritjes maratonike duket se po i vie fundi meqë sipas drejtorit të Agjencisë për Menaxhimin e Komplekseve Memoriale, Bislim Zogaj, shumë shpejt do të shpallet tenderi për projektin.
“Realisht komisioni ndërministror ka formuar grupet punuese të cilat që nga tetori kanë filluar punën dhe së shpejti do ti përcaktojnë kriteret për tenderin e projektit. Shpresojmë se gjatë këtij muaji të hapet tenderi për projektin”, tha Zogaj për Gazetën InLajmi. Libona Gegaj /InLajmi/
