Skuadra e Washingon State Cougars, ka shkruar histori duke u shpallur kampion i turneut PAC-12, duke mposhtur UCLA me rezultat 65-61 të dielën në Las Vegas.
Pjesë e kësaj skuadre është edhe basketbollistja kosovare Astera Tuhina.
Astera Tuhina ka luajtur rol kyç në triumfin e ekipit të saj në debutimin e saj në këtë ligë. Tuhina në finale ka luajtur për 31 minuta, duke realizuar 6 pikë, 6 asistime dhe 3 kërcime, duke marrë vlerësime shumë pozitive për paraqitjen në finale, por edhe gjatë gjithë këtij edicioni.
Trajnerja e skuadrës Washington State Cougars ka thënë se është krenare dhe e lumtur me paraqitjen e saj.
“Ajo në të vërtetë nuk është ‘studente’ e re. Ne e dinim që ditën e parë kur na është bashkuar ajo. Astera është larguar nga shtëpia në moshën 14 vjeçare për të luajtur në Spanjë. Është një lloj fëmije e veçantë. Ka inteligjencë të lartë. Jam krenare dhe e lumtur për paraqitjen e saj. Tezja e saj që jeton në SHBA erdhi dhe e befasoi këtë mëngjes”, ka thënë Ethridge, shkruan FrontOnline
Astera ka luajtur edhe për Kosovën A dhe grupmoshat e reja, ndërsa shumë media kosovare e cilësojnë atë si shpresa e Kosovës.
