Komentatori politik, Adrian Çollaku ka komentuar reagimin e sotëm të kancelarit gjerman lidhur me takimin e kryeministrit Kurti dhe presidentit serb, Vuçiq që do të mbahet në Ohër.
Çollaku ka thënë se kancelari gjerman shumë saktë tregoi se interesi strategjik tani i BE-së është integrimi i Ballkanit Perëndimor në BE, sepse ka ndikuar lufta në Ukrainë dhe vendet perëndimore kanë vënë re se kush nuk është në BE, ndikimi rus është shumë i madh.
“Deklarata e kancelarit gjerman thotë se interesi strategjik i BE-së është integrimi i Ballkanit Perëndimorë në BE, sepse lufta në Ukrainë e ka jep një mësim se nëse nuk arrin me i fut në BE dhe NATO gjithmonë ndikimi i Rusisë është i madh. Dhe nëse BE-ja na bën sikur tash as liberalizim dmth gjithë se vendet e Ballkanit Perëndimor i kanë lënë anash, i bie që në Ballkan nuk do të ketë rahati.”, ka thënë Çollaku në “Politiko”.
Komentatori politik ka thënë se edhe nëse formohet Asociacioni e nuk shkojnë vendet e Ballkanit në BE, harroni që do të ketë paqe në Ballkan.
“Pra edhe nëse ne e japim këtë Asociacion dhe ata e marrin autonominë, ideja është se nëse nuk shkojnë shtetet e Ballkanit në BE harroni që do të ketë paqe në Ballkan sepse mentaliteti i Ballkanit është që shtete mund të funksionojnë vetëm në baza etnike. Zgjidhja e vetme është nëse BE-ja na shtyn përpara drejt anëtarësimit në BE.”, ka thënë ai.
Tutje Çollaku ka thënë se askush nuk ka mëdyshje se a do të bëhet Asociacioni, por cili do të jetë emërtimi dhe modaliteti, shkruan Gazeta10.
“Ndoshta jo në këtë takim, por në takimet e ardhshme të merren vesh për planin e zbatimit ose modalitetin e Asociacionit. Pra askush më nuk ka dilema se a do të bëhet Asociacioni, por cili do të jetë emërtimi dhe modaliteti. Sepse Gjykata Kushtetuese e ka rrëzuar këtë për shkak se është quajtur njëetnik.”
