Presidentja e vendit Vjosa Osmani, në seancën solemne të Kuvendit të Kosovës për nder të 25-vjetorit të Epopesë së UÇK-së, vlerësoi lart kontributin dhe sakrificën e familjes Jashari për lirinë që po gëzojmë sot, raporton InLajmi.
Presidentja e vendit duke folur për betejën e rezistencës në Prekaz, tha se duhet të ruhet kujtesa e sakrificës së familjes Jashari si dhe gjithë të rënëve për liri.
“Ne duhet dhe do ta mbajmë të gjallë kujtesën për sakrificën e familjes Jashari dhe për gjithë luftën e UÇK-së, për të cilën ata e bënë për vendin. Ne duhet ta ruajmë kujtesën për rezistencën e kësaj familje të prirë nga komandanti Adem Jashari, por edhe sakrificën e një populli të tërë si pjesë të historisë sonë të dhimbshme, nga se duke i kujtuar ata, ne e shtresojmë kujtimin për vetveten, e për rrugën të cilën e kemi kaluar për krijimin e shtetit të lirë dhe të pavarur të Kosovës”, tha Osmani.
Presidentja ndër të tjera shtoi se beteja e Jasharajve u shndërrua në frymëzim për mijëra të rinj dhe të reja që iu bashkuan radhëve të Ushtrisë Çlirimtare të Kosovës për liri e pavarësi.
“Zoti e bekoftë familjen Jashari, dëshmorët dhe heronjtë e UÇK-së, Zoti e bekoftë Republikën e Kosovës dhe qytetarët e saj”, tha në fund të fjalimit presidentja Osmani. /InLajmi/
