Kryeministri i vendit Albin Kurti, në seancën solemne të Kuvendit të Kosovës kujtoi sakrificën e familjes Jashari dhe ndikimin që pati kjo rezistencë në luftën për liri, raporton InLajmi.
Kurti tha se qëndresa e familjes Jashari ishte kthyer në rezistencë shembull që frymëzoi të gjithë shqiptarët për t’u çliruar nga Serbia dhe për të ndërtuar shtetin e Kosovës.
“Qëndresa e familjes Jashari u kthye në rezistencë shembull që frymëzoi të gjithë shqiptarët e Kosovës dhe kombin mbarë për t’u çliruar nga Serbia dhe për ta ndërtuar shtetin e Republikës së Kosovës në liri”, tha Kurti.
Kryeministri theksoi se rezistenca e Jasharajve dhe figura e Adem Jasharit janë figurat themeltare dhe qendrore në historinë e Kosovës.
“Në historinë e Ushtrisë Çlirimtare të Kosovës rezistenca e Jasharajve të Prekazit dhe figura e Adem Jasharit janë themeltare dhe qendrore dhe të tilla do të mbesin përjetë”, theksoi i pari i ekzekutivit të vendit.
Kurti falënderoi pjesëtarin e familjes Jashari, Rifat Jasharin, për ruajtjen e historisë së kësaj familje me dinjitet dhe fisnikëri.
“Në emrin tim si kryeministër i Republikës së Kosovës, për të cilën Republikë ka vënë gjithçka në dispozicion nga fjala deri te jeta, dua që me përkulje respekti dhe me ndjesi admirimi t’i them “Faleminderit baci Rifat Jashari. Ju faleminderit që me kaq dinjitet e fisnikëri e keni ruajtur të gjithë atë histori të familjes suaj”, u shpreh kryeministri Kurti. /InLajmi/
