Kryetari i Partisë Demokratike të Kosovës Memli Krasniqi, në seancën solemne të Kuvendit të Kosovës, e cila po mbahet për nder të 25-vjetorit të Epopesë së UÇK-së, tha se me çdo 5, 6 dhe 7 mars emocionet tona ripërtrihen, raporton InLajmi.
Krasniqi derisa kujtoi sakrificën e familjes Jashari, theksoi se fjalia “Liri a vdekje” u bë origjinale pikërisht në Prekaz, ku sot çdo shqiptar përkulet me nderim.
“Liri a vdekje” është një sentecë që po aq origjinale është në udhëtimin tonë historik. Ishte pikërisht marsi i vitit 1998 që këtë sentencë e nxori në një dimension të pakthyeshëm, ku liria si kauzë dhe vdekja për liri dolën nga miti dhe u bënë realitet dhe kjo ndodhi në Prekaz, në atë vend ku sot çdo shqiptar përkulet me nderim, pikërisht aty ku pushojnë të denjët tonë”, tha Krasniqi.
Krasniqi vlerësoi lart kontributin dhe sakrificën e familjes Jashari dhe Ushtrisë Çlirimtare të Kosovës, duke thënë se “sot përkulemi para veprës së tyre heroike, mbi të cilën qëndron themeli i Kosovës së lirë dhe të pavaruar”.
“Sot me zemër të plotë e me vetëdije të lartë dhe me përgjegjësinë që kemi ndaj të ardhmes përkulemi para veprës së tyre heroike, mbi të cilën qëndron themeli i Kosovës së lirë dhe t pavarur”. /InLajmi/
