Me rastin e 25 vjetorit të Epopesë së UÇK-së, kryekuvendari Glauk Konjufca në fjalën e tij në seancën e Kuvendit, tha se rezistenca në Prekaz e sakrifica e Jasharajve është ngjarje e pashembullt që nuk e njeh as historia e botës, raporton InLajmi.
“Lufta e Prekazit dhe sakrifica e Jasharajve është ngjarje e pashembullt në historinë tonë, një të ngjashme nuk e njeh as historia e botës. Lufta ishte aq legjendare, sakrifica aq sublime, kurse vetëmohimi ishte aq tronditës, saqë populli shqiptar kaloi në një tjetër dimension të vetëdijes, bota u zhvendos nga orbita e vet politike”, tha Konjufca
Tutje theksoi kryekuvendari Konjufca shtoi se 5,6 e 7 Marsi i vitit 1998 është kthesa kur sakrifica bëhet epope.
“Liria dhe Pavarësia jonë u shpallën dhe u lajtën me gjak në ata pak metra të kullës së Jasharëve. Ne për liri kemi luftuar gjatë dhe kemi dhënë shumë por lufta e Prekazit dhe rënia e Jasharajve është kondensimi i të gjitha përpjekjeve tona të pareshtura”, tha Konjufca. /InLajmi/
