4 studiues italianë të cilët prej vitit 1995 kryejnë eksplorime të vazhdueshme shpellash në Shqipëri janë ndalur tek Shpella e Ariut në Bishnicë të Pogradecit të cilën e kanë konsideruar si një formacion shumë interesant që mund të kthehet në pikë turistike të vizitueshme.
“Ne vijmë në Shqipëri që prej 1995. Pastaj për shkak të problemeve politike ne u larguam dhe jemi rikthyer sërish në 2009-ën. Ne vijmë 2-3 herë në vit për të bërë spelologji (studim të shpellave, formave dhe veçorive të tyre) për këtë na ka ndihmuar shumë edhe Edmondi i cili na përgatit rrugën për të shkuar kudo dhe për të gjetur shpellat, të cilat ne i studiojmë për kënaqësinë tonë. Ne kemi bërë shumë zbulime interesante, janë të ndryshme.
Spelologët italianë kanë edhe disa këshilla dashamirëse për ministrinë e turizmit.
“Unë jam 70 vjeç, ne si grup funksionojmë që nga 1980 që bëjmë spelologji . Në 1974 bëja spelologji për punët e mia, Shqipëria është e mrekullueshme, gjithmonë kam gjetur mikpritje këtu, jeni shumë të zotë dhe shpresoj që edhe niveli juaj turistik të rritet edhe më shumë në vazhdim. Një propozim për ta kthyer në monument natyre drejt Ministrisë së Mjedisit dhe Turizmit si edhe promocioni i duhur do ta kthejë këtë shpellë në një pikë të rëndësishme turistike”, u shpreh Ivano Fabri, shkruan Top Channel.
Shpella e Ariut është vetëm një nga destinacionet e Bishnicës, ndërkohë që aty gjejmë edhe 2 liqene akullnajore si edhe potenciale të mëdha për zhvillimin e turizmit dimëror.
