Kryeministri i Kosovës Albin Kurti, ka marrë pjesë në ceremoninë e rreshtimit të FSK-së në shënim të 25-vjetorit të Epopesë së UÇK-së, raporton InLajmi.
Kurti tha se origjina e ushtrisë së Kosovës duhet kërkuar në fund të viteve të 80-ta, kur Adem Jashari nisi mobilizimin për formimin e një ushtrie.
“Është kështu sepse origjina e ushtrisë së Kosovës, duhet kërkuar në fund të viteve ‘80-të, atëherë kur Ademi nisi të fliste me shokët për nevojën që kishte Kosova për të patur ushtri. Andaj sot, ne e përmbushim edhe vizionin e atëhershëm të Adem Jasharit për ushtrinë e Kosovës, teksa e ndihmojmë Forcën e Sigurisë së Kosovës, e cila është në proces të transformimit në Forca të Armatosura të Kosovës, duke shtuar personelin dhe rritur kapacitetet, duke u pajisur me armatime moderne dhe duke u trajnuar e stërvitur në akademitë më të mira ushtarake të vendeve tona aleate”, tha Kurti.
Sipas Kurtit, Adem Jashari mund të quhet krahu tjetër i shqiponjës dykrerëshe, që UÇK-ja mbante kokë dhe në krah.
“Ashtu sikur më 1991, Adem Jashari ishte stërvitur nga oficerët e Ushtrisë së Shqipërisë, bashkë me rreth 100 vullnetarë të tjerë, mes të cilëve edhe ai që mund të quhet krahu tjetër i shqiponjës dykrerëshe, që UÇK-ja do ta mbante në kokë dhe në krah, Zahir Pajaziti”, tha Kurti.
Kryeministri iu drejtua edhe ushtarëve të FSK-së, duke iu thënë se duhet ta dijnë se uniforma që mbajnë e ka prejardhjen nga uniforma e Adem Jasharit.
“Për më tepër që e tëra kjo po ndodhë në këtë ceremoni përkujtimore të 25-vjetorit të rënies heroike të Adem Jasharit, në kazermën qendrore të Forcave të Sigurisë së Kosovës, që mban emrin Kazerma “Adem Jashari”. Prandaj, ju ushtare dhe ushtarë, nënoficerë dhe oficerë të Forcës së Sigurisë së Kosovës, sa herë që e veshni uniformën tuaj, mos harroni që po e mbani një uniformë të prejardhur nga uniforma e Adem Jasharit, Kryekomandatit të Ushtrisë Çlirimtare të Kosovës”, tha Kurti. /InLajmi/
