Nëse shteti i Serbisë do ta pranojë marrëveshjen evropiane, e cila do t’i rregullojë marrëdhëniet ndërmjet Kosovës dhe Serbisë, ajo do të jetë një njohje praktike e pavarësisë së Kosovës nga shteti serb. Kështu u shpreh njohësi i çështjeve politike Visar Xani.
Teksa ka folur për takimin e mbrëmshëm ndërmjet kryeministrit Albin Kurti e presidentin serb, Aleksandër Vuçiq, Xani e konsideron si një prej takimeve më të rëndësishme që nga fillimi i procesit të dialogut.
Xani tha Kosova ka dërguar sinjale të qarta me gatishmërinë që ka shprehur për ta nënshkruar marrëveshjen.
Sipas tij, palë dekonstruktive në këtë proces ishte Serbia, pasi thotë se pala serbe nuk e ka pritur që Kosova do ta pranojë këtë marrëveshje.
“Ishte prej takimeve më të rëndësishme prej kur ka filluar procesi i dialogimit. Ishte një takim që shpeshherë u dukej që ka thellësisht paqartësi por me raste duket që ka një përafrim ka një lloj dakordimi dhe sinjali i mirë për Kosovën ishte qe Kosova kishte shprehur gatishmëri që të nënshkruaj këtë marrëveshje. Me gjasë pala serbe ka pritur që Kosova të kundërshtojë dhe sikur u zu e pa përgatitur dhe të njëjtën mënyrë nuk ishte që të pranojë këtë marrëveshje. Unë konsideroj që një marrëveshje e sa më e shpejtë që të arrihet në Bruksel është rezultat më i mirë për Kosovën, për shkak se shumë zhvillime që kanë ndodhur në rajon dhe përgjithësi në botë, por mbetet të shihet, nëse Serbia vërtet e ka seriozisht që të pranojë këtë marrëveshje”, thotë ai.
Ai për Ekonomia Online u shpreh se kjo marrëveshje do ta qartësojë rrugën e Kosovës sa i përket integrimeve euroatlantike, teksa besoj se do ta forcoj sovranitetin e saj.
“Kjo marrëveshje ndoshta do ta qartësojë rrugën e Kosovës sa i përket integrimeve euroatlantike, do të forcojë sovranitetin dhe shtetësinë, dhe në njëfarë mënyre ishte një njohje praktike e pavarësisë nga ana e Serbisë nëse pranohet nga Serbia kjo marrëveshje. I bie që kemi dëshmitarë 27 shtete të tjera të cilat janë në njëfarë mënyre garantues të kësaj marrëveshje dhe njohje praktike të kësaj pavarësie. Këtu konsideroj që është rezultati kryesor i Kosovës dhe e bënë këtë marrëveshje të mirë për Kosovën”, tha Xani.
