Të mbijetuarit kanë treguar për “10 sekondat e makthit” pasi vagoni i tyre i trenit u përmbys dhe u përfshi nga flakët në një aksident në Greqinë veriore, transmeton InLajmi.
Të paktën 32 persona kanë humbur jetën dhe dhjetëra të tjerë janë lënduar nga përplasja midis 2 trenave pranë qytetit të Larisës mbrëmjen e së martës.
Ekipet e shpëtimit kanë punuar gjatë gjithë natës për të gjetur të mbijetuar.
“Dëgjuam një zhurmë të madhe,” tha pasagjeri 28-vjeçar Stergios Minenis, i cili u hodh në vend të sigurt nga rrënojat.
“Për 10, 15 sekonda ishte kaos. Përmbysje, zjarre, kabllo të varura, xhama të thyer, njerëz që bërtisnin, njerëz të bllokuar”, tha njëri prej pasagjerëve.
Njerëzit kanë përshkruar se duhet të zvarriteshin nëpër dritare dhe mbi xhama të thyer ndërsa përpiqeshin të arratiseshin.
Sipas një pasagjeri “xhamat shpërthyen papritur” dhe “njerëzit po bërtisnin dhe kishin frikë”, shkruan BBC.
“Fatmirësisht, ne mundëm të hapnim dyert dhe të arratiseshim mjaft shpejt. Në vagonët e tjerë nuk arritën të dilnin, madje një vagon mori flakë.” /InLajmi/
