Me një shkurt Qeveria e Kosovës ka publikuar vlerën e re të koeficientit të Ligjit të Pagave për punëtorët e sektorit publik, e kjo vlerë prej 105 eurosh thelloi “hendekun e pakënaqësive” mes kategorive të ndryshme e kjo për faktin se disa zyrtarë publikë pësuan rritje pagash e disa ulje, shkruan InLajmi.
Me të publikuar koeficientin e ri të pagave, kryeministri i Kosovës Albin Kurti deklaroi se koeficienti prej 105 eurosh do të krijojë barazi dhe ndershmëri për pagat në mes të kategorive të ndryshme, por kjo nuk u pa nga politikanë e shërbyes civilë, të cilët nuk i kursyen kritikat ndaj Qeverisë së Kosovës, duke e quajtur koeficientin e miratuar si “koeficient të mjerimit”.
Reagimet e pakënaqësitë vazhduan edhe të martën, kur veçse u bë ekzekutimi i pagave sipas ligjit të ri, e ku filluan të bëhen krahasime se sa janë zvogëluar pagat te disa kategori.
Të pakënaqur me Ligjin e ri të Pagave janë pjesëtarët e Policisë së Kosovës, të cilët njoftojnë se përveç zvogëlimit te pagave, atyre u janë hequr edhe shtesat e rrezikshmërisë.
Kryetari i Sindikatës së Policëve të Kosovës Imer Zeqiri, në një deklaratë për InLajmin, theksoi se mbi 90% të policëve janë të pakënaqur me këtë koeficient, derisa shtoi se te disa kategori ka pasur rritje pagash e te disa të tjerë ka ndodhur e kundërta.
“Është e vërtetë se pagat janë ekzekutuar dje dhe ajo ka dalë pa shtesat e rrezikshmërisë për zyrtarët e uniformuar dhe për pjesën tjetër të stafit civil, ku diku ka pasur rritje e diku jo, këto informata i kam nga kontaktet qe i kam pasur drejtpërdrejt me kolegët”.
Për më tepër, Zeqiri tha se po pranon shumë email-e nga policët që po shprehin dëshpërimin e tyre për uljen e pagave.
“Mbi 90% janë të pakënaqur, pakënaqësitë janë jashtëzakonisht të mëdha tek stafi i uniformuar edhe tek stafi civil. Aktualisht jam duke pranuar shumë email-e nga policët që shprehin dëshpërimin e tyre me këtë që ka ndodhur”, tha Zeqiri për InLajmin.
I pyetur se çfarë masa do të ndërmarrin tash e tutje, Zeqiri tha se kjo varet nga kërkesat që do të shtrojnë pjesëtarët e Policisë së Kosovës.
Të dëshpëruar me Ligjin e ri të Pagave janë edhe zjarrfikësit, të cilët janë zhgënjyer me koeficientin e ri, pasi nuk u është dhënë paga e premtuar.
Kryetari i Sindikatës së Zjarrfikësve të Kosovës Muharrem Beka, në një deklaratë për InLajmin shpërfaqi pakënaqësitë që kanë zjarrfikësit lidhur me Ligjin e ri të Pagave.
“Në kontot e zjarrfikësve nuk është bërë rritje prej 200 eurove që ishte paraparë më herët. Tashmë me këtë koeficient mungojnë shtesat për rrezikshmërinë në punë, si dhe mungojnë 30 euro të shërbyesve civil që i kemi përfituar më herët”, u shpreh kryetari i Zjarrfikësve të Kosovës, Muharrem Beka për Gazetën Inlajmi.
Beka thekson se përveçse nuk ka rritje siç ishte paralajmëruar, janë bërë edhe gabime të tjera për shkak të sistematizimit të vendeve të punës.
“Është një rritje e vogël e pagave përgjithësisht, por ka pasur edhe gabime pra dikush ka marrë më shumë e dikush më pak. E këto gabime kanë ndodhur te sistematizimi i vendeve të punës e pozitave të ndryshme p.sh. ai që është në udhëheqje të ndërrimit e ka marrë pagën e zjarrfikësve njësoj”, tha Beka.
Ndërkohë ka shtuar Beka se shtesat për rrezikshmërinë nuk janë ekzekutuar me pagat, porse është premtuar që ato të ekzekutohen në pagën e muajit që vjen.
“Përqindja e rrezikshmërisë tashmë do të vendoset sipas komisionit që është krijuar me rregullore të Qeverisë së Kosovës, siç jemi të informuar këto shtesa të rrezikshmërisë do t’i marrim me pagën e radhës, por sa se do të jetë shkalla ende nuk e dijmë, pasi vendos komisioni”.
Beka shpreson që vlerësimi i shkallës së rrezikshmërisë në punë të jetë real e të mos jetë përsëri dëshpërues.
“Po shpresoj që të bëhet vlerësimi i shkallës së rrezikshmërisë me të cilat ballafaqohen zjarrfikësit në Kosovë”.
Nga ana tjetër, kryetari i SBASHK-ut Rrahman Jashari, ka deklaruar gjatë ditës së djeshme për InLajmin, se nuk janë të kënaqur me koeficientin e ri të pagave, pasi kanë pritur më shumë, por nuk do ta kundërshtojnë me qëllim që nxënësit të mos e pësojnë nga grevat. Shqipe Vishaj /InLajmi/
