Kryeministri i Kosovës Albin Kurti, ka deklaruar se është i gatshëm për çdo raportim në Kuvend, pas takimit që ka pasur më 27 shkurt në Bruksel.
Takim nga i cili edhe u pranua propozimi franko-gjerman, por i cili nuk u nënshkrua.
Por, a do të ftohet kryeministri Kurti për t’u paraqitur para deputetëve për këtë takim, kanë folur nga opozita.
Deputeti i PDK-së, Ferat Shala ka thënë se nesër para seancës do të mblidhen dhe do të marrin vendim për atë se a do ta ftojnë në raportim kryeministrin Kurti për takimin e 27 shkurtit.
“Nesër, ka një takim grupi parlamentar para seancës dhe konsideroj së shumë shpejtë do të kemi një përgjigje rreth kësaj çështje. Aktualisht nuk kemi qëndrim sot, eventualisht nesër më së largti do të kemi qëndrim”, është shprehur Shala.
Por, pavarësisht kësaj thotë se edhe nëse i kryeministri nuk ftohet nga opozita e ka obligim ligjor dhe kushtetues për të raportuar.
“Zhvillimet e reja që kanë ndodhur domosdoshmërisht që kërkon nevoja dhe koha që kryeministri të raportojë në Kuvend qoftë me kërkesë të subjekteve politike, qoftë me kompetencë dhe kërkesë të tij si kryeministër sepse e ka obligim ligjor dhe kushtetues, por ne si subjekt politik ende s’kemi qëndrimin final”, ka thënë ai.
Të rëndësishme që kryeministri Albin Kurti të raportojë në Kuvend për takimin e 27 shkurtit e sheh edhe deputetja e AAK-së, Albana Bytyqi.
Ajo, thotë se duan të dinë se si ka shkuar takimi dhe bisedimet që janë zhvilluar, shkruan FrontOnline.
“Pas takimit që u mbajtë më 27 shkurt mes kryeministrit Kurti dhe presidentit Vuqiç me ndërmjetësimin e BE-së, ne sigurisht se presim që të dimë si ka shkuar aj takim, ato bisedime. Normalisht që është shumë e rëndësishme që kryeministri Kurti të raportojë para deputetëve të Kuvendit në lidhje me dialogun pasi jemi duke fol për një proces shumë të ndjeshëm dhe shumë të rëndësishëm për të ardhmen e vendit tonë”, ka deklaruar Bytyqi.
