Takimi i 27 shkurtit në Bruksel ka prodhuar një situatë të paqartë rreth asaj se kush, çfarë ka pranuar. Dikush e interpreton edhe si pranim për themelimin e Asociacionit, dikush tjetër thotë që Kurti ka pranuar vetëm planin franko-gjerman pa Asociacion duke e argumentuar edhe me faktin që Vuçiq ka refuzuar që të nënshkruajë. Por çfarë prodhoi në të vërtetë takimi i gjatë i së hënës në Bruksel dhe kush çfarë pranoi.
Edhe analisti gjerman dhe eksperti i Democratization Policy Council, Bodo Weber konkludon se deklarimet e Borell, Kurtit dhe Vuçiqit kanë prodhuar një konfuzion për atë se çfarë është arritur.
Sipas tij, ajo që ka ndodhur dje në kryeqytetin e dialogut mund të përkufizohet me sloganin e vjetër që “asgjë s’është arritur derisa s’ka një marrëveshje për gjithçka”.
Epo, nëse krahasohen deklaratat e 3 negociatorëve Borrell, Kurti dhe Vuçiq mbrëmë, mbetet konfuze se çfarë është rënë dakord dje apo nëse s’është rënë dakord fare. Mendoj se e vetmja mënyrë për t’i dhënë kuptim asaj që ka ndodhur është me sloganin e vjetër të dialogut: “Asgjë nuk është arritur derisa të ketë një marrëveshje për gjithçka”, ka thënë Weber.
Bashkimi Evropian dhe Shtetet e Bashkuara të Amerikës në vazhdimësi e kanë përsëritur se marrëveshjet e kaluara duhet të implementohen. Si Brukseli ashtu edhe Washingotni kanë specifikuar se çështja e themelimit të Asociacionit është e karakterit urgjent. Megjithatë duket që kjo çështje do të krijojë telashe edhe në ditët në vijim për negociatorët dhe përkrahësit.
Weber ka thënë se duket që ka mospajtime të qarta në mes të Kosovës dhe Serbisë për Asociacionin dhe jo vetëm për afatet kohore të themelimit.
Eksperti gjerman i cili dje ka dalë edhe me një shkrim autorial përmes të cilit e ka kritikuar propozimin franko-gjerman, thotë se ajo çfarë ka ndodhur dje është që Brukseli vetëm i ka zhvendosur negociatat për Asociacionin tek bisedimet që do të bëhen për aneksin e implementimit, në mënyrë që të deklarojnë një lloj progresi.
Weber s’është optimist që do të ketë ndonjë pajtueshmëri për Asociacionin në negociatat që do të ndodhin gjatë marsit.
“Jo – duket qartë se mosmarrëveshja ndërmjet Prishtinës dhe Beogradit për Asociacionin në nuk është zgjidhur, jo vetëm për renditjen dhe afatet kohore. Kjo do të thotë se mosmarrëveshja dje është zhvendosur vetëm në negociata për aneksin e zbatimit, në mënyrë që të mund të shpallet një lloj përparimi. Nuk ka asnjë informacion mbi të cilin mund të parashikohet se Vuçiq dhe Kurti mund të bien dakord për Asociacionin në takimin e ardhshëm të planifikuar për në mars në Maqedoninë e Veriut”, ka shtuar Bodo Weber.
I pyetur nëse mendon se ka rrezik që të dështojë komplet nisma franko-gjerman dhe nëse se ajo çfarë ndodhi dje ishte një taktikë e Kurtit për të dalë mirë para ndërkombëtarëve në ndërkohë që gjithçka varet nga Asociacioni, Weber shprehet se nuk e di çfarë taktike po përdor Kurti por e thotë qartë që nëse s’ka marrëveshje për Asociacionin s’ka as marrëveshje.
“Sinqerisht nuk e di se cila është taktika negociuese e kryeministrit Kurti. Por nëse nuk ka marrëveshje për Asociacionin, nuk do të ketë marrëveshje për aneksin e zbatimit, pra nuk do të ketë fare marrëveshje, pavarësisht se çfarë është deklaruar mbrëmë”, ka theksuar Weber.
Ai këtu ka kritikuar edhe ndërkombëtarët duke thënë se ata asnjëherë s’e kanë thënë qartë se janë kundër kompetencave ekzekutive të Asociacionit që rrjedhimisht i bie të jenë kundër qëndrimit të Beogradit.
Për këtë çështje Weber thotë se ende s’ka folur as Aleksander Vuçiq dhe s’ka treguar nëse është i gatshëm të tërhiqet nga kërkesa për Asociacioni me kompetenca ekzekutive.
“Dhe këtu nuk bëhet fjalë vetëm për heqjen dorë nga pozita e Kurtit në Asociacionin. SHBA-ja dhe BE-ja, pas një dekade duke iu shmangur qëndrimit për çështjen e kompetencave të Asociacionit, nuk janë pozicionuar kundër kompetencave ekzekutive për Asociacionin, dhe rrjedhimisht kundër qëndrimit të Beogradit. Ne nuk kemi dëgjuar ndonjë reagim nga presidenti Vuçiq për këtë zhvillim deri më tani, kështu që mbetet plotësisht e paqartë nëse Vuçiq është gati të tërhiqet nga ky qëndrim thelbësor i Beogradit”, ka përfunduar Weber për Gazetën Express.
Kryeministri i Kosovës Albin Kurti dhe presidenti serb Aleksander Vuçiq janë takuar të hënën në Bruksel pas një kohe të gjatë. Borell pas takimit ka treguar se të dy janë pajtuar për propozimin franko-gjerman, megjithatë negociata të tjera janë të nevojshme. Miroslav Lajcak përgjatë dy javëve të para të marsit do të vizitojë Prishtinën dhe Beogradin ku do të diskutohet për aneksin e implementimit.Pritet të shihet nëse do të arrihet pajtim për atë se kur do të themelohet Asociacioni apo nëse do të dështojë gjithçka.
