Kryeministri Edi Rama dhe homologu malazez, Dritan Abazoviq, në konferencën e përbashkët në Podgoricë, folën edhe për projektin e urës së Lumit Buna që do të lidhë Velipojën me Ulqinin. Abazoviç theksoi se financimi do të jetë 50 me 50 nëpërmjet qeverisë së Shqipërisë dhe asaj të Malit të Zi.
“Është pak më i shtrenjtë se sa e kemi menduar në radhën e parë. Mendoj se do të kushtojë 20 milionë Euro, nëse ndahet përgjysmë nuk është shumë. E kemi pikën e hapur dhe mjetet rezervë për këtë çështje. Tashmë kemi biseduar që do t’i ndajmë dhe pagesa të bëhet në disa vite dhe të mos jetë asnjë ngarkesë për të 2 vendet tona”, tha Abazoviq
Nga ana tjetër, kryeministri Rama theksoi se ky projekt ka një vlerë të jashtëzakonshme për të 2-ja vendet, pasi siç shtoi ai, do të ndihmojë shumë edhe në industrinë turistike, shkruan Abc.News.al.
“Është një projekt, i cili ka një vlerë të jashtëzakonshme sepse më në fund do të lidhë 2 anët e një kufiri që është 300 metra sa është ura. Projekti është gati, sfida është të hartojmë një procedurë, është hera e parë që ndodh që 2 qeveri do të hapin një garë ndërkombëtare me një komision të përbashkët. Pastaj do të përcaktohet fituesi”.
