Ministri i drejtësisë i Turqisë ka njoftuar se kanë nisur hetimet për më shumë se 600 persona në lidhje me ndërtesat që u shembën në tërmetin katastrofik në fillim të këtij muaji, transmeton InLajmi.
Ministri i Drejtësisë, Bekir Bozdag tha se 184 nga 612 të dyshuarit ishin burgosur në pritje të gjykimit. Në paraburgim janë marrë kontraktorët e ndërtimit dhe pronarët ose menaxherët e ndërtesave, tha ai.
“Zbulimi i provave në ndërtesa vazhdon si bazë për hetimin penal”, shtoi Bozdag.
Pas tërmetit me magnitudë 7.8 të 6 shkurtit, i cili çoi në gati 48.000 të vdekur në Turqinë jugore dhe Sirinë veriore, turqit kanë vënë në pikëpyetje qëndrueshmërinë e 173.000 ndërtesave që u shembën ose u dëmtuan rëndë, shkruan US.News.
Ekspertët kanë thënë se shumë ndërtesa të rrëzuara janë ndërtuar me materiale të dobëta dhe jo në përputhje me standardet e qeverisë. Partitë opozitare kanë akuzuar Qeverinë e presidentit Recep Tayyip Erdogan për dështim në zbatimin e rregulloreve të ndërtimit. /InLajmi/
