Ish-kryetari i Komunës së Mitrovicës, Agim Bahtiri, me përkrahësit e tij kanë organizuar një tubim në fshatin Gushavc, për t’i dërguar porosi kryeministrit Kurti që të mos e pranojë Asociacionin e komunave me shumicë serbe, raporton InLajmi.
Bahtiri theksoi se Asociacioni do të jetë “tumor” për shtetin tonë, nëse veç pranohet.
“Është brengë e gjithë qytetarëve tonë, e sidomos të kësaj ane, e cila ka ndikim… Çdo asociacion i cili bëhet në Kosovë do të jetë tumor i shtetit tonë sovran. Të drejtat që ne ua kemi dhënë pakicave nuk i ka dhënë në asnjë vend në botë”, tha ai.
Bahtir Istrefi nga Sindikata e Kombinatit “Trepça” i bëri apel kryeministrit Kurti që të mos e nënshkruajë Asociacionin.
“Ne nuk i pranojmë këto Asociacione se nuk janë të mira për ne por të dobishme për Serbinë. Ne duhet të ngulim këmbë dhe të mbrojmë këtë vend. Sepse më këtë Evropë deri te molla e kuqe na ka pru Serbia deri këtu me njerëzit tonë që kanë qenë të shitur. I bëjë apel Kryeministrit që do të shkojë atje të mos gabojë të hyjë në këto punë sepse Asociacionet nuk i pranojmë”, tha ai. /InLajmi/
