Shenjat e trafikut shërbejnë për t’i paralajmëruar vozitësit për rrezikun që mund t’u kanoset në ndonjë vend të caktuar, por jo gjithmonë këto shenja respektohen nga qytetarët, e ky mosrespektim në mënyrë direkte kontribuon në shtimin e numrit të aksidenteve dhe rreziqeve në komunikacion, shkruan InLajmi.
Se pakujdesia në komunikacion është e madhe dhe shenjat e trafikut nuk respektohen e tregojnë edhe shifrat alarmante të aksidenteve në vendin tonë, pasi vetëm gjatë muajit janar sipas të dhënave nga Policia e Kosovës dërguar për InLajmin, kanë ndodhur 1.549 aksidente në total, shifër kjo mjaft shqetësuese.
Eksperti i komunikacionit dhe njëherësh profesori në Kolegjin “Tempulli”, Muhamed Krasniqi, në një deklaratë për InLajmin, ka shpërfaqur faktorët kryesorë që ndikojnë në rritjen e numrit të aksidenteve në Kosovë, derisa ka folur edhe për çështjen se sa i njohin qytetarët e Kosovës shenjat e trafikut dhe sa i respektojnë përgjithësisht ato.
Krasniqi derisa përmendi përqindjen e vetëaksidenteve në Kosovë theksoi se qytetarët nuk i njohin mjaftueshëm shenjat e trafikut, por në veçanti shoferët fillestarë.
“Përderisa sipas të dhënave zyrtare nga institucionet tona, rreth 33% i numrit të përgjithshëm të aksidenteve të trafikut në vend klasifikohen si vetëaksidente, mund të dyshojmë se qytetaret i njohin mjaftueshëm rregullat dhe shenjat e trafikut rrugor. Kjo mosnjohje kryesisht mund të ndodhë te shoferët fillestarë”, tha ai.
Eksperti i komunikacionit vlerëson se në Kosovë ashtu si në çdo vend tjetër, ekziston një numër i vogël i qytetarëve, të cilët nuk “e çajnë” kokën për rregullat dhe shenjat e trafikut.
“Sikurse në secilën shoqëri dhe në secilin vend, gjithmonë ka një numër të vogël qytetaresh që nuk çajnë kokën fare për respektimin e rregullave dhe shenjave të trafikut. Kosovarët mendoj se i respektojnë rregullat dhe shenjat e trafikut pothuajse ngjashëm me qytetaret e vendeve fqinje në rajonin tonë”, tha ai për InLajmin,
Krasniqi thekson se vetë faktori njeri është shkaktari kryesor i aksidenteve ndërsa nuk përjashton as faktorët e tjerë të cilët i kontribuojnë drejtpërdrejt shtimit të aksidenteve.
“Si zakonisht faktori njeri me veprimet e tij kur është pjesëmarrës në rrugë është shkaktari kryesor i të gjitha aksidenteve në trafikun rrugor, e sidomos kur ai është në cilësi të drejtuesit të mjetit motorik dhe shumë më pak në rastet e tjera kur ai lëviz si këmbësor apo çiklist. Pas faktorit njeri kemi edhe automjetet dhe rrugët, por edhe shkaktarët e tjerë. Natyrisht automjeti, rruga dhe faktorët tjerë në numër shumë më të vogël mund të jenë shkaktarë apo kontribuues të aksidenteve në trafikun rrugor”, tha Krasniqi.
Sipas ekspertit të komunikacionit, rrugët në Kosovë nuk janë të shenjuara mirë, por siç thekson ai, problem më të madh përbën mosrespektimi i shenjave ekzituese.
“Problematikë përbën mosrespektimi i rregullave dhe shenjave të trafikut rrugor dhe jo mungesa e shenjëzimit në rrugë. Edhe nëse nuk kemi shenja të trafikut mjaftueshëm në rrugë atëherë duhet t`i referohemi rregullave të lëvizjes sipas legjislacionit në fuqi sa i përket qarkullimit rrugor. Rrugët në Kosovë nuk janë te shenjuara më së miri, por problemi qëndron te mosrespektimi i shenjave ekzistuese”, tha ai për InLajmin.
Ndryshe, siç duket as gjobat e trafikut e as apeli i përditshëm i Policisë së Kosovës për kujdes të shtuar nuk po ndikon aspak te qytetarët e Kosovës, pasi numri i të vdekurve dhe të të lënduarve nga aksidentet po rritet nga muaji në muaj, duke kapur kështu shifra alarmante.Shqipe Vishaj /InLajmi/
