Ish-kryeministri i Kosovës, Avdullah Hoti ka thënë se rritja e importit të produkteve bujqësore në vitin 2022 nuk është asgjë tjetër pos një shenjë e qartë se sa shumë ka rënë prodhimi vendor, përcjell InLajmi.
Ndërsa tutje ai ka shfaqur disa statistika të Doganës së Kosovës e që sipas tij janë shqetësuese që tregojnë sa shumë ka rënie të prodhimeve vendore.
Hoti ka rikujtuar deklaratën e tij në vitin 2021 kur pati thënë së nëse nuk ndihmohen bujqit, atëherë sektori i bujqësisë do pësoi rënie të konsiderueshme.
Postimi i plotë i tij:
RRITJA ENORME E IMPORTIT TË PRODUKTEVE BUJQËSORE GJATË VITIT 2022 – SHENJË SE PRODHIMI VENDOR KA RËNË
Që nga fundi i vitit 2021 e kam theksuar disa herë, se nëse nuk rritet menjëherë mbështetja për bujqit, rritja e konsiderueshme e çmimit të inputeve bujqësore (farëra, plehra, pesticide dhe ushqim të kafshëve) do të dëmtojë prodhimin vendor. Dje e kam përsëritur këtë shqetësim pasi çmimet e këtyre inputeve bujqësore po vazhdojnë të rriten.
Ministri i Bujqësisë, në vend se të sqaroj se çfarë po bën për të zbutur krizën për bujqit, kishte shkruar një pamflet me plot tallje e cinizëm. Faktet tregojnë se efektet e punës së tij janë zero.
Sipas të dhënave nga Dogana e Kosovës, gjatë vitit 2022 krahasuar me vitin 2021:
- Importi i llojeve të ndryshme të grurit është rritur me 63% (2021 – 22.7 mil euro, 2022 – 36.9 mil euro).
- Importi i llojeve të ndryshme të mishit është rritur me 51% (2021 – 82.5 mil euro, 2022 – 124.5 mil euro).
- Importi i gjedheve për therje është rritur me 42% (2021 – 45.2 mil euro, 2022 – 64.2 mil euro).
- Importi i qumështit dhe produkteve të qumështit është rritur me 32% (2021 – 56.8 mil euro, 2022 – 75.2 mil euro).
Kjo rritje është tepër e madhe pavarësisht rritjes së inflacionit. Nuk ka gjasa që në Kosovë më 2022 të jetë rritur kaq shumë konsumi i qumështit, grurit apo mishit. Kështu që, këto shifra tregojnë se ka rënë prodhimi vendor, dhe se konsumi është plotësuar nga rritja e importit.
Le t’ia sqaroj dikush Ministrit të nderuar këto të dhëna. Në ditët e ardhshme do të publikohen edhe të dhëna të tjera për të demaskuar mashtrimin dhe dështimin e kësaj qeverisje. /InLajmi/
