Ish-deputeti LDK-së, Naser Rugova, ka folur në lidhje me qeverisjen 2 vjeçare të Lëvizjes Vetëvendosje.
Rugova është shprehur se pavarësisht pritjeve të mëdha që kanë qenë për këtë maxhorancë, rezultati është tepër i zbehtë.
Ai ka theksuar gjatë këtij 2 vjeçari nuk ka patur progres, ka ikje të madhe të profesionistëve shëndetësore, nuk ka reforma në ekonomi dhe shëndetësia është para kolapsit.
“Zgjedhjet e 14 shkurtit të vitit 2021 sollën një Qeveri të re me një maxhorancë që nuk kishte ndodh më herët në Republikën e Kosovës. Pritjet kanë qenë edhe të qytetarëve edhe të opinionit, mbase edhe të partnerëve tanë strategjikë për ndryshime për reforma dhe për një transformim jo vetëm të ekonomisë por edhe të gjyqësorit dhe komponentëve të tjerë që e bëjnë shtetin shtet. Premtimet kanë qenë enorme, edhe të partnerëve të koalicionit por edhe të gjithë atij grupimi ishin bashkë në fushatën elektorale të zgjedhjeve të 14 shkurtit . Por realiteti është krejt ndryshe, gjysma e mandatit qeverisës e kësaj maxhorance më e fuqishmja që nga zgjedhjet e para pas lirisë së K0sovës, nuk shohim progres, nuk shohim realizim premtimesh, situata në arsim është dukshëm më e zbehtë dhe e pashpresë se përpara se të vinte kjo Qeveri në pushtet, shëndetësia është para një kolapsi. Kemi një ikje të madhe të profesionistëve shëndetësorë, në veçanti e specialistëve të nivelit sekondar dhe terciar . Nuk kemi asnjë investim kapital që ka peshë nacionale, vazhdim të projekteve të qeverive të kaluara.”, deklaroi Rugova.
Rugova e ka cilësuar të dështuar qeverinë e Albin Kurtit edhe sa i përket politikës së jashtme, përcjell Gazeta Blic.
Ish-deputeti i LDK-së tha se nuk ka transparencë në procesin e dialogut dhe mungesë e një konsensusi nacional sa i përket kësaj teme.
