Presidenti i Turqisë, Recep Tayyip Erdogan, ka bërë të ditur se vendi i tij në muajin mars do të nisë ndërtimin e shtëpive në zonat e goditura pas 2 tërmeteve të mëdha në Turqinë jugore më 6 shkurt.
Në një konferencë për media në provincën Hatay, presidenti Erdogan tha se ndërtimi i afër 200 mijë shtëpive për viktimat e tërmetit do të nisë në muajin mars në 11 provinca, Adana, Adımayan, Diyarbakir, Gaziantep, Hatay, Kahramanmaras, Kilis, Malatya, Osmaniye, Sanliurfa dhe Elazıg, të gjitha këto të prekura nga tërmetet me magnitudë 7.7 dhe 7.6.
Erdogan njoftoi se nevoja për strehim për mbi 1.68 milionë njerëz të prekur nga 2 tërmetet, me qendër në provincën Kahramanmaras, është plotësuar. Gjithashtu, shtoi ai, 115 mijë të mbijetuar deri më tani janë shpëtuar nga rrënojat pas tërmeteve.
Sipas shifrave të fundit zyrtare, të paktën 41.156 persona humbën jetën dhe 105.505 të tjerë u plagosën nga 2 tërmetet e fuqishme që goditën pjesën jugore të vendit, shkruan Anadolu Agency.
Si pasojë e tërmetit, gjithashtu edhe në Siri humbën jetën të paktën 5.840 persona.
