Për kot nuk thuhet “Zoti pa mjek mos na lashtë”, por si duket kjo lutje duhet thënë më shpesh tash e tutje, pasi Kosova ka mungesë të theksuar të mjekëve e sidomos të anesteziologëve, shkruan InLajmi.
Pra për në Qendrën Klinike Universitare të Kosovës mund të thuhet lirisht se ka mbi dyfish më pak anesteziologë nga se do të duhej të kishte derisa QKUK-ja është qendër referete e gjithë Kosovës për ofrimin e shërbimeve sekondare e terciare shëndetësore.
Të paktën kështu është thënë për Gazetën InLajmi në një përgjigje zyrtare nga drejtori i Klinikës së Anesteziologjisë dhe Mjekimit Intensiv Qendror, Gazmend Spahija i cili tha se brenda QKUK-së janë 45 anesteziologë e për përmbushjen e kërkesave për ndërhyrje kirurgjikale normale duhet të jenë të paktën 120 anesteziolog.
“Në Qendrën Klinike Universitare të Kosovës për momentin janë të punësuar vetëm 45 anesteziologë”, ta Spahija.
Bazuar në nevojat dhe kërkesat e pacientëve 120 anesteziologë do të mund t’i kryenin shërbimet spitalore dhe gjithçka do të funksiononte ashtu siç duhet.
“Sipas llogaritjeve të Klinikës së Anestezionit dhe Mjekimit Intensiv në Qendrën Klinike Universitare të Kosovës për funksionimin normal të të gjitha njësive ku kërkohet prania e anesteziologut duhet të jenë së paku 120 anesteziologë të punësuar”, tha drejtori në një përgjigje zyrtare për Gazetën InLajmi.
“Numri i vogël i anesteziologeve nuk arrin të siguroi mbulueshmëri të plotë të të gjitha sallave operative dhe njësive tjera (internistike, radiologjike, onkologjike dhe pediatrike) prandaj disa raste “të ftohta” edhe mund të prolongohen ndërhyrjet kirurgjikale ”, përfundoi drejtori Spahija.
Kujtojmë se pavarësisht numrit të kufizuar të anesteziologëve, të gjitha rastet urgjente trajtohen në kohë reale, kuptohet me prioritet janë këto raste e të cilat kryhen sipas programeve operative edhe pse me vështirësi.
Ndryshe, Kosova vitet e fundit po sfidohet me ikjen e popullatës në vendet e 3-ta, ndërsa në mesin e qytetarëve që po zgjedhin Evropën si zgjidhje ideale për jetë më të mirë janë edhe punëtorët shëndetësor të fushave të ndryshme. Arjanita Osmanaj /InLajmi/
