Liqeni Akumulues në qytetin e Mitrovicës dje ishte si mos më keq.
Numër i madh i peshqve ngordhën pasi mbetën në baltë, si pasojë e thatësisë së madhe që u krijua nga rënia e nivelit të ujit.
Banorët e kësaj ane thonë se ajo çfarë ndodhi dje ishte një katastrofë. Sipas tyre ndonëse është premtuar përkujdesje më e madhe, shumë pak po bëhet për ruajtjen e kësaj hapësire rekreative.
Drejtori për Mbrojtje të Mjedisit në Komunën e Mitrovicës, Egzon Sadiku, ka thënë se digat në liqen kanë mbetur të hapura për shkak të gjendjes që u krijua pas vërshimeve të janarit.
“Digat sipas informatave kane mbetur te hapura për shkak të incizimit real të gjendjes së liqenit”.
Është konstatuar që duhet të ndërhyhet ne pastrimin e brendshëm te shtratit, ne mënyrë që me të gjithë peshkatarët dhe qytetaret e Mitrovicës ta ringjallim prapë florën dhe faunën përgjatë liqenit.
Sadiku mohon se rënia e nivelit të ujit ka shkaktuar ngordhjen e peshqve.
“Kjo gjendje nuk mendojmë se është shkaktuar nga thatësia sepse sot gjendja është normale edhe pse s’ka pasur reshje këto 2 ditët e fundit”, ka thënë Sadiku për RTK.
Mitrovica ishte ndër komunat më të prekura nga vërshimet që ndodhën në fund të janarit si pasojë e reshjeve të shiut.
