Më 27 shkurt në Bruksel do të takohen kryeministri i Kosovës, Albin Kurti dhe presidenti serb, Aleksandër Vuçiq.Se ata i ka ftuar në takim e ka konfirmuar përfaqësuesi i lartë i BE-së, Josep Borrell, i cili ka thënë se shpreson që Kosova dhe Serbia të pranojnë planin evropian që është në tryezë.
Analisti Gazmir Raci, e ka quajtur lajm të mirë rikthimin në tryezën e bisedimeve, teksa thotë se palët duhet t’i japin përgjigjet e tyre për draftin përfundimtar të kësaj zgjidhje kalimtare për dialogun.
“Është lajm i mirë që pas një kohe të gjatë palët po rikthehen në tryezën e bisedimeve në nivel të liderëve. Jemi në fazën finale kur të 2-ja palët duhet të japin përgjigjet e tyre për draftin përfundimtar të kësaj zgjidhjeje kalimtare në dialog”, thotë ai
Raci pret qartësi më të madhe të pozicioneve të Kosovës e Serbisë pro apo kundër planit evropian.
“Pres qartësi edhe më të madhe të pozicioneve të të 2 ja shteteve dhe arritje të konkludimeve se a janë për apo kundër planit të BE-së që ka mbështetjen edhe të SHBA-ve”, vlerëson analisti.
Sipas tij, ndërkombëtarët kanë interes që ta zgjidhin këtë problem në mes të 2 vendeve, në këtë 6 mujor, dhe se kjo do ta qetësonte Ballkanin Perëndimor dhe ndikimin rus në të.
“Për shkak të zhvillimeve gjeopolitike komuniteti ndërkombëtar ka interes që në këtë 6 mujor të parë të këtij viti, ta zgjidh problemin në mes të Kosovës dhe Serbisë dhe pastaj të adresohen sfidat në luftën Ukrainë-Rusi. Marrëveshja në këtë fazë do ta qetësonte Ballkanin Perëndimor dhe do të parandalonte shtrirjen e mëtejme të ndikimit të Federatës Ruse në këtë pjesë të Evropës Juglindore”, deklaron Gazmir Raci.
